إزاي تنظم تاسكاتك من غير خطط ماتمشيش عليها؟
أكتر حاجة ضيعت من وقتي فترات طويلة هي الخطط اللي بنقعد نعملها، زي جداول المذاكرة كده، اللي في الآخر بتفرح بشكلها وتعلقها على الحيطة، لكن عمرك ما بصيت ليها تاني!
الطريقة اللي نفعت معايا
قعدت مدة طويلة أحاول ألاقي طريقة أنظم بيها تاسكاتي، سواء في الشغل أو برة الشغل، ومالقيتش أي حاجة نفعت معايا غير حاجة بسيطة جداً:
- بكتب الحاجات اللي عايز أنجزها طول الأسبوع بشكل مفصل، وبقسم التاسكات لـ MUST (الحاجات اللي لازم تتعمل) و SHOULD (الحاجات اللي المفترض تتعمل، بس مش ضرورية أوي).
- كل يوم الصبح باختار الحاجات اللي عايز أشتغل فيها النهارده (ده طبعاً في حالة إن مفيش حاجة مستعجلة ولازم تتسلم في يوم معين).
- بقعد آخر الأسبوع أقيّم إيه الحاجات اللي خلصتها من الليستة.
الطريقة دي نفعت معايا لأني من النوع اللي بيتشتت بسهولة، وفي نفس الوقت مخي بيرفض أي قيود عليه. فالخدعة دي بتحسس مخي إنه هو اللي بيختار التاسكات كل يوم، لكن في الحقيقة مابيخرجش برة الإطار الأسبوعي.
اللي نفع معايا إنك تكون عشوائي شوية بس بحدود، يعني تكون عارف عايز تخلص إيه وتضيفه عندك في ليستة، وطول ما وقتك يسمح شد من الليستة دي. مش لازم كل حاجة تبقى perfect.
وبالمناسبة، عقلية All or nothing دي ضيعت مني كتير برضه. فتقبل إن فيه حاجات ممكن ماتخلصش عادي، بس المهم إنك تسجل الأفكار الجديدة اللي بتجيلك وتضيفها عندك، وكل ما يكون عندك وقت جرب حاجة جديدة.
أحياناً كنت بعمل خطط وبضيع فرص كتير لمجرد إني عايز أمشي على الخطة اللي أنا عاملها وخلاص، حتى لو الحاجة الجديدة أحسن من اللي موجود عندي في الخطة.