إزاي تتعامل مع ضغط الشغل المفاجئ قبل ما تنفجر؟
تبقى قاعد في حالك، فجأة يجيلك حد يطلب منك ميتنج، وفي نفس اللحظة يكتشفوا bug على البرودكشن ولازم تدخل تحلها في أقرب وقت، غير الشغل اللي معاك ولازم يتسلم!
طب إزاي تتعامل مع الضغط اللي بيحصل فجأة ده، واللي بيخليك تنفجر؟
للأسف وقتها بنلاقي نفسنا دخلنا في حالة توتر، وده بيخلينا لا عارفين نشتغل ولا عارفين نرمي كل ده ونرتاح.
الحل اللي نفع معايا فعلاً، ويمكن ينفع معاك: إنك تسيب كل ده وتقوم تعمل أي حاجة، حتى لو هتقف في البلكونة من غير موبايل.
دماغك ساعتها هتقنعك إنه لا ومفيش وقت، لكن بالعكس، الوقت ده هو اللي هيخليك تنظم الدنيا عندك قبل ما تنفجر، وتعرف إمتى ولمين تقول لا، وإيه الحاجات اللي ليها الأولوية. ولو عرفت تنام نص ساعة يا ريت، بس نص ساعة بس. بس خد بالك، موضوع النوم في الوقت ده عايز أعصاب جامدة شوية.
المشكلة إننا بنستجيب للضغط ده وبنسحل دماغنا، وفي الآخر الوقت بيضيع في اللاشيء، وبرضه مفيش حاجة بتتعمل، ولو اتعملت الجودة بتطلع سيئة جداً.