إزاي تساعد الـ Junior يتغلب على خوفه من الـ Code Review؟

من الحاجات اللي خدت بالي منها من وقت ما بدأت أعمل الـ Mentorship Program، إن الـ juniors أحياناً مش بتكون مشكلتهم تكنيكال بس.

بالعكس، ناس كتير منهم بيكونوا شاطرين والكود بتاعهم بالنسبة لعدد سنين خبرتهم كويس، لكن معظمهم بيخاف من فكرة إنه يعرض الكود على حد يراجعه، خصوصاً لو ده محصلش معاه قبل كده في الأماكن اللي اشتغل فيها، خوفاً من الـ feedback اللي هيجيله.

دي يمكن من الحاجات اللي اتعلمتها مؤخراً: إزاي إنت كـ mentor ليهم تدعمهم نفسياً ومعنوياً، وتحاول تحتوي أخطاءه بشكل ما يفقدهوش الثقة في نفسه.

الفكرة دي جاتلي من حد معايا شاطر جداً وبيعرف يجيب المعلومة لو وفرتله ظروف مناسبة. في أغلب الأيام كان بيخلص اللي عليه بدري، لكن كان عنده مشكلة إنه متردد يرفع الكود علشان أراجعه، وكنا لازم نعمل ميتنج يومياً تقريباً علشان نراجع الكود قبل ما يعمل PR، علشان يتأكد إنه تمام.

مع الوقت لاحظت ده، وخليت الـ review دايماً يتم بعد ما بيعمل submit للكود، علشان أكسر عنده حتة الرهبة، لحد ما بقى متقبل فكرة الـ feedback اللي بتجيله.

واللي خدت بالي منه كمان إن طريقة كتابته للكود اختلفت، عكس الفترة الأولى اللي كان بيرفع الكود فيها لمجرد إنه يخلص منه وخلاص!

علشان كده بقيت دايماً أهتم بالجانب النفسي قدر الإمكان، وأعرّفه إننا في ظروف المفروض يغلط فيها ويتعلم من غلطاته، علشان يتجنب ده في الشغل الحقيقي بعد كده.