ليه متبدأش تكتب كود أول ما العميل يشرح فكرته؟

مينفعش تبدأ تكتب كود أول ما العميل يخلص شرح لفكرته!

العميل لما بيكلمك بيكون في الغالب عنده فكرة عايز ينفذها، وفي أوقات كتير بتكون الفكرة لسه بيدرسها من كذا جانب. الغلطة اللي بنقع فيها كمبرمجين إننا بنبدأ نفكر في التنفيذ من بدري أوي، ومش هو ده الصح.

في المرحلة دي المفروض العميل يكون حاسس إنك شريكه، بتفكر معاه وتقوله وجهة نظرك، اللي هيكون جزء منها تكنكال طبعاً، مع خلاصة خبرتك في المشاريع اللي عملتها وتشبه الفكرة دي.

عايز أقولك إن في المرحلة دي نسبة إنك تلغي أو تضيف features بتكون عالية جداً، وده بيقلل احتمالية الخناقات اللي بتحصل في الآخر، إن العميل يقولك مش ده اللي عايزه. رغم إن ده ممكن يكون اللي اتفقتوا عليه، لكن هو كان متخيله حاجة تانية، ولما اتنفذ على أرض الواقع مكانش متوقع ده.

أفتكر مرة كنت بتناقش مع عميل وكان عنده فكرة قوية جداً، لكن كان مقرر يستخدم منتج جاهز وإحنا نعدّله. بعد مناقشات طويلة لقينا إن المنتج ده مش هيخدم فكرته في المستقبل في بعض الحالات، وقتها قررنا إننا نعمل الفكرة من الصفر، ونستخدم بعض الحاجات الجاهزة في الجوانب اللي مش أساسية أو مش core بالنسبة للبيزنس بتاعه.

علشان كده دايماً بشوف إن المرحلة دي بتخدم الـ freelancer وتخلي البيزنس بتاعه مختلف ويعيش لسنين قدام، مش مجرد بيعمل مشروع وخلاص. وبرضه بتساعد العميل إنه يشوف فكرته في المستقبل بناءً على خبرة الـ freelancer اللي معاه.