العميل عايز يعمل زي تطبيق مشهور؟ ده red flag

من أكبر الـ red flags اللي بتكون موجودة في شغل الـ freelancing، إن عميل ييجي يقولك: أنا عايز أعمل زي الموقع أو الأبلكيشن الفلاني ده. ويا سلام لو الأبلكيشن ده كبير وعليه features كتير.

لو وقتها قبلت المشروع على الوضع ده، اعرف إنك عاجلاً أم آجلاً هتلبس في حيط، إنت والعميل، والموضوع ينتهي بمشاكل كتير.

مينفعش خالص الـ requirements كلها تتختزل في فكرة إننا عايزين نعمل شبه المنصة الفلانية. الجملة دي بتسبب مشاكل كتير بين العميل والديفلوبر، لإن المطلوب مابيكونش واضح، ومفيش حد بيعمل clone 100%. لازم يكون فيه تغييرات واختلافات، وأحياناً ده بيستهلك وقت أكتر بكتير من المتوقع.

الحل

لازم تقعد مع العميل مدة تفهم هو عايز إيه بالظبط، وتكتب كل المميزات اللي هتشتغلوا عليها. ماتسيبش أبداً الموضوع مفتوح.

علشان كده دايماً بشوف إن مرحلة الـ analysis لازم نديها وقتها، علشان نتجنب المشاكل اللي بتحصل بسبب عدم وضوح المطلوب من البداية، لإن ده هيوفر وقت وفلوس كتير بعد كده.