ذاكرت كتير ومش عارف تطبق؟ إزاي تنقل للخطوة الجاية
أكتر حاجة بشوف الناس متحيرة بسببها، إن الواحد ذاكر واتعلم مواضيع كتير، لكن مش عارف يطبق على إيه ولا ينقل للخطوة اللي بعدها، والمرحلة دي للأسف بتطول معاه جداً.
هقولك على شوية حاجات تاخد بالك منها، إن شاء الله تقلل الحيرة دي:
- ماتستخدمش أي AI tool في كتابة الكود في المرحلة دي، علشان تدرب إيدك كتير.
- ممكن تستخدم الـ AI علشان يشرحلك موضوع معين ويقولك عليه أمثلة.
- اتعلم إزاي تخلي الكود يبقى نضيف، ويا سلام لو لقيت حد يراجع معاك الكود بتاعك، علشان لما تستخدم بعد كده أي AI tool تقدر تعدل عليه وتظبط الكود.
- ماتسمعش كلام حد يقولك هضيفك على جروب علشان نذاكر مع بعض. فكك.
- اشترك في Medium واهتم بالـ engineering blogs، حتى لو صعبة في البداية.
- أي حد يقولك مش لازم الأساسيات ماتصدقهوش.
- اتعلم Git كويس جداً.
- شوف أي تدريب حتى لو مدفوع واعتبره استثمار.
- لو ليك حد من صحابك أو زمايلك القدام، خليه يعملك virtual interview علشان تتدرب على الإنترفيوهات.
- لو فيه جروب أو شخص بيحبطك، الغي متابعته فوراً.
- نفذ أي فكرة تيجي في دماغك، ماتفكرش كتير.
- خليك عارف إن التقدم بيجي بخطوات بسيطة، مش مجرد خطط و roadmaps شكلها حلو وخلاص. المهم تكون بتتحرك، وكل حاجة بتوضح مع الوقت.
لو عرفت تنفذ جزء من الحاجات دي، هتلاقي نفسك بتتطور مع الوقت إن شاء الله.