نصايح للشغل Remote من تجربتي

ده مقال عشوائي للي عايز يشتغل ريموتلي أو بيشتغل بالفعل، حبيت أشارك معاكم فيه بعض الحاجات اللي فرقت معايا، سواء في الشغل أو نظام اليوم:

• فكرة إنك تلعب رياضة أو تروح جيم مش رفاهية، أو على الأقل تتمشى نص ساعة كل يوم.
• بعد التمرين حاول تفصل عن أي سوشيال ميديا ولو ساعة، وماتعملش أي حاجة غير إنك تتأمل في أي حاجة أو تشرب قهوتك في هدوء.
• الشغل الريموتلي بيأثر على الحياة الاجتماعية فعلاً، فلازم تعوّض ده بأي طريقة مناسبة ليك.
• الـ Setup بتاع مكتبك في البيت أهم حاجة في حياتك.
• فكك من أي application للتاسكات طالما شغال لوحدك أو معاك حتى تيم صغير، اكتب الحاجات اللي عايز تعملها على أي ورقة، المهم تخلّصهم.
• اهتم بـ LinkedIn، بس ماتصدقش كل حاجة عليه، ولا تحاول تكون مصطنع.
• خليك مدرك إنك مش هتبقى مُلِم بكل حاجة في المجال، فبلاش جلد ذات، وذاكر المهم بالنسبالك.
• نفّض للـ meetings اللي ملهاش لازمة.
• اتعلم أي أداة بتعمل automation.
• اشترك في Medium Premium.
• أي بوست بيقولك التجميعة دي هتخليك تنين، فكك منه.
• لو فيه bookmarks على Chrome بقالها أكتر من شهر، فهي مش مهمة، امسحها.
• الشغل على Upwork كويس، وفيه حاجات فعلاً هتعلمك كتير، بس محتاج صبر جداً علشان تظبط أول كام شغلانة.
• قبل ما تعمل personal branding اعمل person الأول.
• اكتب الحاجات الحلوة اللي حصلتلك في يومك.

دي بعض الحاجات اللي جت في بالي من غير ترتيب.