أخطاء وقعت فيها كـ Freelancer وأتمنى ما تقعش فيها

زي ما بنشارك دايماً الحاجات الكويسة، خليني أشارك معاكم الأخطاء اللي وقعت فيها خلال الفترة اللي اشتغلت فيها:

1. كنت بنزل في سعر الخدمات اللي بقدمها، لدرجة إني أحياناً كنت بظلم نفسي وبشتغل مدة أطول، وبلاقي النتيجة مش مرضية.
2. كنت مقرر إني هكمل كـ Freelancer، وجه عليا وقت كنت محبط فيه واشتغلت في كام شركة، وده ضيع عليا فرص وعملاء كتير.
3. أوقات كتير مكنتش حاطط هدف لليوم، ولا عارف المفروض أخلص إيه، والنتيجة إن معظم اليوم بيضيع.
4. كنت بصحى وقت ما أنا عايز.
5. كنت بستخسر أحياناً أشتري كورسات.
6. اشتغلت في مشاريع لمجرد إني مكنتش عارف أقول "لا".
7. جربت applications كتير علشان أنظم التاسكات اللي عليا، وده ضيع وقت كبير مني.
8. لما كنت ببقى مضغوط في الشغل، كنت بوقف البوستات والشرح، مع إن الموضوع ده ممتع جداً بالنسبالي.
9. مكنتش بحط حدود ولا أوقات للتواصل بيني وبين العملاء، وده في فترة من الفترات كان بيضغط عليا نفسياً جداً.
10. كنت بفكر دايماً إن أي حاجة لازم أتعلمها تكون علشان هستخدمها بكرة، مع إن الحقيقة إن فيه حاجات بتتعلمها وممكن تفيدك بعد سنين، مش لازم في وقتها.
11. وأكبر غلطة بالنسبالي: ساعات كنت ببدأ شغل من غير مقدم، وفعلاً دي من أكتر الغلطات اللي أتمنى محدش يقع فيها.