مذاكر ومش عارف إنت مؤهل للشغل ولا لأ؟

أكتر سؤال بشوفه بيتكرر من زمان: أنا اتخصصت باك إند وذاكرت OOP، Design Patterns، DB، ومش عارف أنا كده مؤهل للشغل ولا لأ؟

بحاول أجاوب على السؤال ده في معظم اللي بكتبه، علشان مريت بالحيرة دي في فترة من فترات حياتي، وحتى لما قررت أعمل mentorship program كان علشان أجاوب على السؤال ده بشكل عملي ومناسب للشخص، مش رد عام وخلاص.

المشكلة فين؟

أحياناً بنذاكر المواضيع لمجرد إنها ترند، مش علشان هنستفيد منها، أو بنعمل ليستة طويلة عريضة علشان نضمن إن كل المطلوب إحنا مذاكرينه، وللأسف الموضوع مش بيمشي كده.

برضه فيه شركات بتستغل ده علشان تنزّل الناس تدريب من غير مقابل، رغم إن الشخص ممكن ينزل شغل كـ fresh عادي ويقبض فلوس بدل ما ينزل ببلاش!

اشتغل بإيدك

إجابتي دايماً بتكون: اشتغل بإيدك في أي فكرة تجيلك، وكل حاجة هتوضح بعد كده.

• خلي أي حد يدخل بروفايلك يبقى عايز يشتغل معاك.
• أي فكرة تجيلك طبقها ونزلها على GitHub، وماتتكسفش مهما كنت عامل غلطات.
• اطلب من أي حد تثق فيه يعملك code review.
• المهم ماتسيبش فرصة غير وتستغلها.

للأسف السوق دلوقتي كله شبه بعض وفيه منافسة عالية جداً، وعلشان تبعد عن كل ده، اشتغل وطبق كتير. اللي بيظهر وبينجح فعلاً هو اللي بيفرك وبيجرب كتير، ملهاش حل تاني.

اعرف السوق عايز إيه

ادخل على LinkedIn وشوف بوستات لوظايف في مجالك، وشوف المواضيع المشتركة بينها وركز عليها. ممكن كمان تتواصل مع شركات في نفس مجالك أو مع الـ HR اللي فيها، لعل وعسى يكونوا بيوظفوا في الفترة اللي إنت سألت فيها.

بس خد بالك إنك تشوف شركات سمعتها كويسة، أو على الأقل مش الشركات اللي بتطلب الشخص يكون فاهم كل حاجة. هتتعب من البحث في الخطوة دي، لكن هتجمع معلومات محترمة عن السوق ومتطلباته.

دايماً خلي تركيزك إنك تاخد خطوات ناحية الشغل، مش مجرد مذاكرة وخلاص.

وآخر نقطة هنصحك بيها: مفيش طريق واضح هيوصلك للي إنت عايزه. دايماً حاول تسعى في كل الطرق الممكنة لحد ما تلاقي الطريق المناسب ليك.