إزاي تعمل محتوى كـ Freelancer من غير ما تزهق؟

أغلب الناس بتبدأ تعمل محتوى، وساعات بيكون ممتاز، ومع ذلك مش بيكمّلوا. علشان كده في المقال ده هتكلم عن إزاي تمرّن عقليتك وتشوف الموضوع من زاوية تانية وإنت بتعمل محتوى، علشان ماتزهقش، وبرضه يحقق هدفك كـ freelancer.

1. ليه أعمل محتوى أصلاً؟

لازم تفكر إنت بتعمل ده ليه؟ لأن لو هدفك تجيب عميل بعد شهر فغالباً هتحبط وتزهق. لازم تبقى حاطط هدف واضح، وتشوف إنت بتقدم إيه وعايز الناس تعرفك بيه، علشان تبقى عارف هتكلم مين.

2. الريتش مش مقياس

أغلب العملاء ممكن يكونوا مش بيتفاعلوا معاك ولا مرة على أي محتوى، لكن هما متابعينك كويس، وأي حاجة تيجي في بالهم عن مجالك هتكون إنت أول شخص يكلموه.

3. مينفعش تبيع

ماتخليش هدف المحتوى بتاعك دايماً إنك تبيع للعميل. محدش فينا بيحب إن حد يبيع له، رغم إني عايز أشتري. بس ممكن تعملها بطريقة فيها حرفنة، زي إنك تدخّل العميل في عملية البيع بشكل غير مباشر وعلى المدى الطويل.

بمعنى؟ إنك تكون بتحرك العميل ناحية حتة معينة من الخدمة أو المنتج بتاعك من غير ما تجبره على ده. العميل لما يشوف إنك بتقدم كل ده في المجال بتاعك مجاناً، هيقول: أومال خبرته نفسها هتكون عاملة إزاي؟ بس مهم أوي تعمل ده بشكل صادق علشان تفيد وتستفيد.

لكن ده مايمنعش إنك من وقت للتاني تنشر إنجازاتك، علشان ده بيقوّي الثقة جداً بينك وبين الناس.

4. علّم الناس حاجة

عامل المحتوى بتاعك كأنك بتفتح علاقة صداقة شخصية بينك وبين العميل، علشان كده هو اسمه Personal Brand. وفي المرحلة دي طبيعي يكون هدفك إنك تبني ثقة مع العميل، وده بيتم عن طريق أكتر من حاجة:

• إنك تعلّم العميل حاجة تساعده في شغله.
• تنوّرله فكرة مكانتش في باله.
• أو إنك تاخد الموضوع في سكة تانية، زي مثلاً تعلّم الناس في مجالك معلومات تساعدهم وتنقلهم خبرتك.

وهنا مش بقول إنك تعمل ده بغرض التسويق بس. المهم تخصص جزء من وقتك في إنك تعلّم الناس معلومات مفيدة مهما كنت شايفها بسيطة، الناس محتاجاها.

5. لازم تتكلم بأسلوبك إنت

بنشوف دلوقتي بوستات مكتوبة بالـ AI، بس ليه ده بيضرك جداً؟

تخيل معايا إنك بتكتب بوستات من مصادر مختلفة في مواضيع مختلفة، بعد مدة البروفايل بتاعك هيكون ملهوش هوية، ولا الناس هتبقى عارفة طريقتك.

كمان مينفعش أروح أجيب شوية معلومات وأحطها في بوست وأقول أنا بعمل محتوى. لازم تنقل خبرتك وتجاربك.

6. ماتستعجلش

لما تبدأ تكتب محتوى، ماتبصش على النتايج وتستعجل. إنت بتبني ثقة، وده بياخد وقت طويل، لكن وقت ما الثقة دي هتكون موجودة هتبقى عملت لنفسك positioning قوي في مجالك.

7. ماتتكسفش

ناس كتير بتتكسف تظهر قدام الناس. أحب أصدمك: إنك لو فضلت مكسوف مش هتعمل حاجة ولا هتتحرك. انشر محتوى واغلط عادي، محدش مهتم!

8. جرّب كتير

شوف إيه نوعية المحتوى اللي بتعمله بمجهود قليل من غير ما تحس إنه عبء عليك، حتى لو هتبدأ بإنك تعمل كومنتات على بوستات، بس تكون بتقدم حاجة مفيدة فعلاً.

9. تكون مستعد للي هيشتري

طب أنا عملت كل ده وفيه عملاء بدأت تيجي تسألني، لكن بيمشوا بعدها، أعمل إيه؟

هنا إنت فعلاً عرفت تقنع العميل بيك، لكن معرفتش تقفل البيعة معاه. فلازم تكون محضّر للمرحلة دي كويس، زي ويب سايت تعرض عليه خدماتك، بروفايل قوي يوضح خبرتك، أو حتى Packages سهل يشتريها.

أسوأ حاجة إن العميل يبقى جاهز يشتري لكن إنت مش جاهز تبيع!

في النهاية، لو وصلت لحد هنا فأنا بشكرك جداً على وقتك. المقال طويل، لكن حبيت أشارك معاكم بعض التجارب اللي أنا مرّيت بيها السنين اللي فاتت، وإن شاء الله الفترة الجاية هنتكلم عن كل نقطة منهم بشوية تجارب وأمثلة توضحلك الفكرة وتسهّلها عليك أكتر.