إزاي تعمل Portfolio كـ Backend من غير مشروع كامل؟

هقولك على تريكاية ممكن توفر عليك وقت كبير، خصوصاً لو شغال باك إند (ولو فرونت إند تمشي برضه).

لما تكون عايز تضيف مشروع في البورتفوليو، ماتروحش تعمل بروجكت كامل من أوله لآخره، لأن يا إما محدش هيهتم يشوف كل التفاصيل دي، يا إما إنت هتزهق وتحبط في نص السكة. طب أعمل إيه؟

اعمل موديول صغير متقفل صح

شوف إيه الموضوع اللي عايز تطبق عليه واعمل موديول صغير. وليكن إنت ذاكرت WebSockets، اعمل شات سيستم صغير، بس الـ flow والـ implementation متقفلين صح وجاهزين. مش لازم تدخل في تفاصيل بيزنس وتعقّد الدنيا على نفسك.

يعني شوف جزء صغير من الحاجة اللي الناس بتسأل عنها واعملها وانشرها public، وارد جداً حد يكون عايز يعمل زيها ويكلمك علشان تنفذها في السيستم عنده.

فدايماً خلي في بالك إن البورتفوليو يكون فيه حاجات صغيرة بس مفيدة.