الناس هتحب جداً تسمع القصص والتجارب بتاعتك، غير إن ده مع الوقت بيخلي شريحة من الناس تثق فيك.

طب أنا مبتدئ ومعنديش خبرات، أعمل إيه؟

شاركنا الرحلة بتاعتك، وقولنا بتعمل إيه علشان تتعلم أو تطور نفسك.

من نوعية المحتوى اللي بحبها جداً، لما حد يكتب إنه هيعمل تحدي 100 يوم علشان يتعلم حاجة معينة، زي الباك إند مثلاً، ويفضل ينزل بوست أو فيديو عن اللي اتعلمه النهارده. البوستات دي بتشجعني أنا شخصياً، وبيكون عندي فضول أعرف هو وصل لإيه.

الـ handover جزء من البراند بتاعك

دلوقتي كله بيتكلم عن الـ personal branding، ورغم إنه موضوع مهم حتى لو الناس بقت بتسف عليه كتير، لكن واحدة من أهم الحاجات فيه، واللي محدش بيتكلم عنها، هي الـ handover.

لما تمشي من شركة أو مشروع، لازم تسلمه وتمشي بشكل يليق بيك، لأن السيرة دي هي اللي بتفضل. كمان لو فيه أي مشاكل متوقعة في الكود ومالحقتش تحلها، اقعد مع الشخص اللي بيستلم وفهّمه كل حاجة وإزاي يحلها.

التفاصيل الصغيرة دي هي اللي بتبني البراند بتاعك، مش شرط البراند يكون لوجو وبوستات وفيديوهات.

يعني مينفعش أنزل السعر 20% مثلاً من غير ما آخد مقابلها امتيازات، زي تقليل جزء من الـ scope، وقت زيادة، مقدم أكبر، أو أي امتيازات تانية تعوض فرق السعر ده.

لأنك لو نزلت السعر من غير دول، العميل غالباً هيحس وقتها إنك كنت مزود عليه السعر من غير مبرر.

وحتى لو عجبه شغلك وقرر يكمل معاك تاني، هتلاقيه بيفاصل معاك في كل مرة جامد جداً، لأنه شايف إن سعرك فيه قابلية دايماً للنزول من غير أي حاجة هو بيدفعها في المقابل.

1. التعامل مع الـ pointers في الـ C أسهل بالنسبالي من الـ CSS.
2. الـ light mode بقى هو الـ theme المفضل ليا.
3. الـ freelancing مش بيخليك انطوائي، بالعكس، بتتعامل من خلاله مع ناس وعقليات مختلفة.
4. الكورسات المملة اللي فيها رغي كتير هي غالباً أكتر كورسات هتستفيد منها.
5. الفيسبوك أحياناً بيجي من عليه شغل أحسن من LinkedIn.
6. مفيش حاجة اسمها أنا هبدأ أتعلم فأروح آخد كورس full stack. ابدأ باك إند أو فرونت إند بس.
7. الفرونت إند مش أسهل من الباك إند، ده ممكن يكون أصعب كمان.
8. لو فيه bug مش عارف تحلها، ماتحاولش معاها، ادخل نام وهيجيلك الحل.
9. 1% من الـ standup meetings هي اللي بتكون مفيدة فعلاً.
10. الشركة مش دورها الرئيسي إنها تعلمك، دي مسؤوليتك إنت.
11. أي كتاب بيبدأ بـ introduction to، اعرف إنك هتقضي فيه نص عمرك، بس هتطلع بخبرة ومعلومات تقيلة.

في يوم قررت أفهم Laravel شغال إزاي من جوه (مش من الـ docs، لكن كـ implementation). المهم قعدت أذاكر فيه شوية وماكنتش فاهم حاجات كتير، بس قلت خلينا نعمل فريم ورك صغير كده من الأول ونشوف.

التجربة شدتني جداً رغم إنها كانت صعبة، ومكانش فيه ChatGPT ولا الكلام ده، بس كنت بعمل سيرش كتير أو أسأل ناس من زمايلي.

اللي فهمته من التجربة دي

قعدت شوية في الحكاية دي، لقيت نفسي فهمت حاجات كتير في وقت قليل، زي:

• الـ Event Listener شغال إزاي ومعمول إزاي، مش مجرد استخدام.
• فهمت Design Patterns كتير بشكل عملي، لإنك شايف بتستخدم في إيه قدام عينك، زي الـ Facade اللي Laravel معتمد عليه بشكل كبير.
• خلاني أشوف حتت من كتب زي Head First Design Patterns مثلاً، واللي مرة ورا التانية لقيتني تقريباً خلصت 80% منه، وبجد أرشحه لأي حد شغال backend.

فنصيحتي لأي حد عايز يطور نفسه في أي مجال ويبعد عن المنافسة: شوف الحاجة اللي إنت شغال بيها واتعمق فيها جداً، هاتها من جذورها، ما تبقاش مجرد user ليها.

• ماتقارنش نفسك بأي حد نهائي مهما كان. شوف إنت كنت فين وبقيت فين، دي المقارنة الوحيدة المسموحة ليك.
• شوف شغل ناس كتير، خليك بايت على GitHub وشوف مشاريع كتير عليه.
• ذاكر داتا بيز كويس جداً.
• ذاكر system design وشوف cases كتير، زي إزاي أعمل منصة فيديوهات تستحمل ترافيك عالي. مش لازم تكتب أي كود، بس تفهم المشكلة والحلول الممكنة.
• لو فيه حاجة بتكررها في شغلك كتير، ممكن تعملها package وتخليها open source.
• افهم عن الـ marketing، business، sales، علشان تكون فاهم باقي الفرق بتعمل إيه وتقدر تشارك معاهم، مايبقاش دورك منفذ بس.
• لو شغال على سيستم قديم في شركتك، ماتقولش دي حاجة قديمة ملهاش لازمة، ده كنز بالنسبالك. إنك تفهم كل حاجة ليه وإزاي اتعملت، غير إن ده هيخليك شاطر في الشغل نفسه وفي التاسكات بتاعتك.
• مش لازم تجري ورا أي tool بتظهر جديدة وخلاص، علشان مش هتلاحق.
• لو معاك سينيور في الشركة بتاعتك، استغله واستفيد منه قدر الإمكان.

آخر وأهم نصيحة: مفيش معادلة أو checklist تمشي عليها علشان تخليك أحسن، جرّب كتير واشتغل بإيدك كتير، وكل حاجة بتتحسن مع الممارسة والتجارب.

هقولك على شوية حاجات تاخد بالك منها، إن شاء الله تقلل الحيرة دي:

• ماتستخدمش أي AI tool في كتابة الكود في المرحلة دي، علشان تدرب إيدك كتير.
• ممكن تستخدم الـ AI علشان يشرحلك موضوع معين ويقولك عليه أمثلة.
• اتعلم إزاي تخلي الكود يبقى نضيف، ويا سلام لو لقيت حد يراجع معاك الكود بتاعك، علشان لما تستخدم بعد كده أي AI tool تقدر تعدل عليه وتظبط الكود.
• ماتسمعش كلام حد يقولك هضيفك على جروب علشان نذاكر مع بعض. فكك.
• اشترك في Medium واهتم بالـ engineering blogs، حتى لو صعبة في البداية.
• أي حد يقولك مش لازم الأساسيات ماتصدقهوش.
• اتعلم Git كويس جداً.
• شوف أي تدريب حتى لو مدفوع واعتبره استثمار.
• لو ليك حد من صحابك أو زمايلك القدام، خليه يعملك virtual interview علشان تتدرب على الإنترفيوهات.
• لو فيه جروب أو شخص بيحبطك، الغي متابعته فوراً.
• نفذ أي فكرة تيجي في دماغك، ماتفكرش كتير.
• خليك عارف إن التقدم بيجي بخطوات بسيطة، مش مجرد خطط و roadmaps شكلها حلو وخلاص. المهم تكون بتتحرك، وكل حاجة بتوضح مع الوقت.

لو عرفت تنفذ جزء من الحاجات دي، هتلاقي نفسك بتتطور مع الوقت إن شاء الله.

فكرة إنك تقعد مع نفسك وتبني حاجة من وجهة نظرك إنت هتلبّسك في حيط. اعمل MVP بسيط جداً، ومن هناك اتحرك. منه الناس هتعرف اللي إنت بتعمله، ومنه هتجمع فيدباك محترم هيخدمك لما تيجي تبيع.

وأهم ما في الموضوع، إن الحاجة دي تكون بتحل مشكلة حقيقية فعلاً، مش مجرد حل إنت عامله لمشكلة مش موجودة!

وهنا مش بتكلم على فترة الصيانة اللي بتقدمها بعد ما بتخلص شغلك، لا، أقصد بعد كده بكتير. حاول يكون فيه تواصل على فترات تتأكد إن الشغل اللي سلمته ماشي كويس. ولو فيه حاجة محتاجة update بسيط ممكن تساعد العميل في شركته ومبيعاته، حاول تخصص لها وقت وتعملها.

ده نوع من أنواع الـ customer delight اللي فعلاً بيفتحلك فرص جديدة، وبيوصلك لشبكة عملاء جداد من خلال عميل واحد.

• حاول تسأل حد تكون عارف إنه اشتغل في الجزئية دي تحديداً وتكون واثق فيه، وبلاش تسأل في جروبات عامة.
• ماتسألش أي AI، لإن الـ rate اللي بيسعّر بيه عالي.
• حاول تسعّر بالتقريب، شوف السعر المرضي ليك وإنت شغال واطلبه، وتقبّل فكرة الفصال أو الرفض. وطول ما إنت بتجرب وبتغلط هتوصل للصح.
• لما يكون عندك شغل كافي والدنيا مستقرة، حاول تسعّر بسعر عالي نسبياً. ولو الدنيا عندك مريحة شوية، نزّل في السعر شوية بسيطة.

لما لقيت الطريقة دي ماشية، قلت أنا هطبق نفس الفكرة دي مع كل العملاء. ولما جه عميل اتعاملت معاه بنفس الطريقة، الدنيا ما كانتش ماشية كويس خالص. بالعكس، اتعطلنا كتير، لإنه مكانش له في الـ tools الكتير ولا إنه يتابع عليها، لكن هو فاهم البيزنس بتاعه بشكل ممتاز.

وقتها اقتنعت فعلاً إن في شغلك كـ freelancer لازم تكون مرن وتفهم دماغ العميل قبل ما تتعامل معاه، وإن مفيش طريقة واحدة هتمشي على كل العملاء.

دي بصراحة بشوفها من أصعب الحاجات، ويمكن عيب من عيوب الـ freelancing، إنك ماتقدرش تحط باترن محدد وواضح لكل مشروع، لكن لازم تكون مرن جداً.

الأحسن تطلب منه اجتماع علشان تشرحله المميزات اللي هياخدها بالسعر ده.

للأسف الغلطة دي كلفتني كتير زمان، ولما بدأت أعمل كده الموضوع بدأ يظبط معايا. غير إن ده بيخلي مهاراتك في بيع خدماتك تتحسن بشكل ملحوظ مع الوقت.

للأسف، مع توافر أدوات الـ AI بقى فيه systems كتير بتتعمل بدافع الحماس، وإننا عايزين نظبط نظام لشركتنا، فبقى بيتعمل شغل كتير ويتركن.

كل الناس حالياً بقوا عايزين يعملوا سيستم للشركات بتاعتهم، على الرغم من إن الشركة ممكن تكون جديدة أو الموظفين قليلين ومش محتاجين كل ده. وممكن جداً يكونوا محتاجين الـ workflow بتاع الشركة نفسها يتظبط، حتى لو بشكل manual في البداية. ولما يكبر ويكون معقد، ساعتها نبدأ نفكر في إزاي نعمل system أو automation للجزء ده.

فالأفضل ماتبدأش بسيستم وتمشّي الموظفين عليه في البداية، لإن ده هيزود عبء كبير عليهم، وهيخليك إنت كصاحب شركة تبذل مجهود وفلوس مش في محلها.

طبعاً لكل قاعدة استثناء، وفيه شركات بتحتاج تعمل ده من أول يوم. لكن أنا بتكلم من واقع تجربتي إن فيه systems اتعملت ومحدش اشتغل بيها، لإن الـ workflow بتاع الشركة مش واضح من الأساس.

عندك حلين:

1. إنك تطلب تدخل معاه ميتنج سريع تشرحله إيه اللي إنت عملته ونفذته في الـ apps دي، بطريقة مش تكنيكال لكن توضح خبرتك بطريقة سهلة يقدر يفهمها. وطبعاً مينفعش يشوف أي بيانات حساسة، هو مجرد ديمو، ولو هتعرض حاجة أكتر من كده لازم تاخد الإذن الأول.
2. تبعتله case studies عن المشاكل اللي قابلتك في شغلك وإزاي قدرت تحلها. وحاول تختار حاجات من اللي اشتغلت عليها تكون قريبة من البيزنس بتاع العميل.

لكن في حالة إنك بتعمل إنترفيو أو حد تكنيكال طلب يشوف شغلك، ممكن تبعتله GitHub عادي للمشاريع بتاعتك، مش مشاريع الشركة ولا العملاء.

علشان كده لازم تحاول يكون ليك نقط قوة تنافس بيها، سواء بجودة المنتج أو بفهم دماغ عميلك. وعلشان توصل لده، محتاج تسمع من الفئة بتاعتك كتير وتعرف بيفكروا إزاي، علشان لما تعمل منتج يكون متفصل عليهم.

نفس الكلام للـ freelancers

الكلام ده ينطبق على الـ freelancers كمان. علشان كده دايماً بقول بلاش تشتغل بسعر قليل جداً (إلا في أضيق الحدود)، لإن مش معنى إنك قللت سعرك إن العميل هيختارك، بالعكس، هيشك في جودة اللي بتقدمه.

حاول تذاكر كتير وتفهم أكتر عن مجالك، علشان تقدم خدمة كويسة يتدفع فيها فلوس على المدى البعيد.

• فكرة إنك تلعب رياضة أو تروح جيم مش رفاهية، أو على الأقل تتمشى نص ساعة كل يوم.
• بعد التمرين حاول تفصل عن أي سوشيال ميديا ولو ساعة، وماتعملش أي حاجة غير إنك تتأمل في أي حاجة أو تشرب قهوتك في هدوء.
• الشغل الريموتلي بيأثر على الحياة الاجتماعية فعلاً، فلازم تعوّض ده بأي طريقة مناسبة ليك.
• الـ Setup بتاع مكتبك في البيت أهم حاجة في حياتك.
• فكك من أي application للتاسكات طالما شغال لوحدك أو معاك حتى تيم صغير، اكتب الحاجات اللي عايز تعملها على أي ورقة، المهم تخلّصهم.
• اهتم بـ LinkedIn، بس ماتصدقش كل حاجة عليه، ولا تحاول تكون مصطنع.
• خليك مدرك إنك مش هتبقى مُلِم بكل حاجة في المجال، فبلاش جلد ذات، وذاكر المهم بالنسبالك.
• نفّض للـ meetings اللي ملهاش لازمة.
• اتعلم أي أداة بتعمل automation.
• اشترك في Medium Premium.
• أي بوست بيقولك التجميعة دي هتخليك تنين، فكك منه.
• لو فيه bookmarks على Chrome بقالها أكتر من شهر، فهي مش مهمة، امسحها.
• الشغل على Upwork كويس، وفيه حاجات فعلاً هتعلمك كتير، بس محتاج صبر جداً علشان تظبط أول كام شغلانة.
• قبل ما تعمل personal branding اعمل person الأول.
• اكتب الحاجات الحلوة اللي حصلتلك في يومك.

دي بعض الحاجات اللي جت في بالي من غير ترتيب.

التجربة دي حرفياً هتعلمك حاجات الشغل اليومي عمره ما هيعلمهالك، ومع ذلك ناس كتير لسه مهملينها ومش مدركين قيمتها الحقيقية.

مثلاً، بلاقي ناس كتير جداً مش بيتعلموا في شغلهم كتير، وبيكونوا قاعدين مستنيين أي فرصة يتعلموا. دايماً بنصحهم إنهم يشتغلوا على حاجة Open Source، أو لو عايز تجرب framework أو technology جديدة.

ده غير إنه هيخليك تشوف طرق تفكير مختلفة تماماً عن اللي متعود عليها، وهيخليك تبني شبكة علاقات كبيرة ما كنتش تتخيلها، لمجرد إنك مستمر وبتشوف مشاريع كتير، أو حتى إنت اللي بتعمل المشاريع دي. ولو بشكل مش منظم في البداية، برضه هتتعلم كتير جداً.

كمان مش متخيل ده هيساعدك قد إيه في الـ interviews اللي هتعملها، لأنه هيبقى مرجع ودليل إنك عايز تتعلم ودايماً بتطور نفسك.

إزاي تبدأ؟

المشكلة دايماً في البداية. بس شوف أي فكرة (حتى لو معمولة قبل كده مليون مرة) وحاول تقلدها وتعملها بطريقتك، ومع الوقت طورها وانشرها.

هتلاقي الموضوع فرق معاك جداً في كل حاجة، وهتبقى عارف إيه هي نقاط ضعفك اللي المفروض تركز عليها.

الموضوع كله محتاج شوية وقت ومجهود، وهتلاقي نتائج مبهرة مع الوقت إن شاء الله.

1. الترافيك المتوقع

تسأل عن العدد أو الترافيك المتوقع للسيستم ده في أول فترة، علشان على أساسه تحدد الـ scaling من ناحية السيرفرات والـ DB والـ Storage وحاجات كتير.

2. الـ Read أكتر ولا الـ Write؟

طبيعة السيستم إيه، هل الـ Read فيه أكتر ولا الـ Write؟ يعني لو بتعمل حاجة زي Content/Feed Application، مش زي ما تكون بتعمل Logging System.

3. الـ core modules

إيه أكتر modules تعتبر الـ core بتاع الـ application؟ دي اللي هنركز عليها من ناحية الـ performance والـ security أكتر من غيرها، علشان ما نستهلكش مجهود ووقت في غير مكانه.

لإن مش كل الموديولز ليها نفس الأولوية، فيه حاجات ممكن يبقى نسبة الـ failure بتاعتها مقبولة، وحاجات تانية مش مقبولة تماماً.

4. الأدوات الخارجية

لو هتستعين بـ tools خارجية، افهمها كويس. ما تعملش integration على طول، واسأل نفسك: لو الأداة دي مبقتش متاحة، إيه الـ Plan B بالنسبالك؟

دي حاجات جت في دماغي عشوائية كده تاخد بالك منها، لإن على المدى البعيد فيه حاجات تصليحها صعب وبياخد مجهود، فالأفضل إننا نتدارك ده من البداية.

• ادرس الشركة كويس، وشوف شغلهم على LinkedIn أو على السوشيال ميديا عموماً.
• شوف الموظفين اللي هناك والمسؤول عن الـ technical، علشان ده غالباً اللي هيعمل معاك الإنترفيو، وشوف لو بيكتب بوستات أو مقالات بيركز على إيه؟ (الطريقة دي خلتني أعدي من إنترفيو قبل كده.)
• حاول تسأل الموظفين هناك عن رأيهم في المكان.
• ابحث عن الشركة في جروبات الفيسبوك وانطباعات الناس عنها.
• ماتنساش برضه تبص بصة على Glassdoor علشان تشوف تقييمات الشركة من حيث البيئة والإدارة والمرتبات.
• لازم تحضر أسئلتك عن كل حاجة عايز تعرفها عنهم، مفيش حاجة اسمها كله تمام مفيش أسئلة.
• ماتقولش المرتب المتوقع قدر الإمكان لو اتسألت عنه، وحاول تعرف الـ budget المقترح. ولو اضطريت تقول، تكون عارف الرينج كويس من البحث في كل مكان، وتسأل اللي تثق فيهم مش أي جروب وخلاص، علشان ماتظلمش نفسك ولا تدي متوسط يخليك تترفض.
• لو طلبوا إثبات دخل من الشركة القديمة أو رقم ناس اشتغلت معاهم علشان يسألوا عليك، ارفض ده وعرفهم إن ده شغل مش خطوبة!
• وأهم نقطة: تكون مظبط بروفايلك على LinkedIn وقايل كل حاجة عنك بصراحة ووضوح ومن غير أي تجميل. ويا سلام لو بتكتب بوستات هناك وبتشرح فيها مواضيع في مجالك، ده هيديلك أفضلية كبيرة بين المنافسين.

• Design Patterns
• Refactoring
• Code Review
• Debugging
• AI Skills and Sub Agents

الفترة دي فيه كمية apps بتتعمل بالـ AI مش طبيعية، فيه منها اللي مش هيكمّل، وفيه منها اللي هيكبر. ومع الوقت العميل هيكون محتاج حد يعتمد عليه علشان يصلّح اللي اتعمل ويزوّد عليه بطريقة نضيفة، أو على الأقل هيكونوا محتاجين مراجعة للي اتكتب بالتفصيل.

سيبك من اللي بيقولك إن المذاكرة مبقاش ليها لازمة.

الأساسيات اللي مش محتاجين نكررها

خلينا نتفق إن فيه حاجات بديهية لازم تعملها، زي إنك تظبط البروفايل بتاعك كويس، وتاخد بالك من الأخطاء الإملائية (وممكن تستخدم أي أداة تساعدك في التصحيح أو ChatGPT)، وكمان تظبط الـ portfolio بتاعك أو حساب الـ GitHub في حالة إنك مبرمج.

الحاجات اللي لازم تاخد بالك منها

1. لازم يكون الـ proposal بتاعك بيقدم حل لمشكلة العميل، مش مجرد سرد لخبرتك وخلاص، لإن فيه مئات بيعملوا كده. حاول تتعب شوية وتفهم مشكلة العميل وتقدمله حل حتى ولو على ورق، بس يكون قابل للتنفيذ.
2. ما تقدمش على أي job تيجي قدامك، غير لما تكون واثق إنك تقدر تعملها، وعدد اللي مقدمين عليها مش كبير، ويكون العميل نشيط (active)، علشان ما تضيعش الـ connects على الفاضي. لإنها للأسف بقت محدودة جداً ولازم تشتريها بفلوس بعد كده (أنا بفضل الحل ده لكن في حدود، يعني ما تصرفش فلوس كتير أوي مقابل إنك تقدم على أي job وخلاص).
3. النقطة دي مهمة جداً ودي عن تجربتي: لما بتحدث بروفايلك وتهتم بيه، بروفايلك بيظهر في نتايج البحث أسرع، وبيجيلك invitations كتير من عملاء. وده لوحده كفيل يجيبلك شغل من غير حتى ما تقدم.
4. لازم تسأل وتعرف سعر الساعة بتاعتك، علشان ما تبقاش عالية ولا قليلة، ودي محتاجة منك شوية بحث عن الأسعار في مجالك.
5. حاول تستغل السوشيال ميديا كويس في تسويق مهاراتك وخدماتك، يعني ما تبقاش حاصر نفسك جوه Upwork بس، لإن الـ freelancing أوسع بكتير من إنه يكون داخل منصة واحدة.
6. وإنت بتقدم حالياً، Upwork بيديلك إمكانية إضافة مشاريع مشابهة من اللي عملتها، حاول تضيف أقرب حاجة للـ job اللي بتقدم عليها.

بلاقي ناس كتير مذاكرين مواضيع كتير، وبرضه خايفين يقدّموا على شغل أو حاسين إنهم مش مؤهلين. فحبيت أكتب عن الحاجات اللي تخليك تقول إنك تقدر تدور على شغل:

1. لو عملت على الأقل مشروع واحد حتى لو بسيط، فيه CRUD مثلاً، بس شغال ومفيهوش أخطاء كتير، وخلاك تفهم الـ workflow بتاع الشغل ماشي إزاي.
2. بتعرف تشرح الكود اللي إنت كتبته لحد تاني، حتى لو الـ AI ساعدك فيه، بس تكون فاهمه كويس.
3. عندك فكرة كويسة عن الـ Git.
4. بتعرف تعمل سيرش وتطلّع المعلومة اللي عايزها.
5. بتعرف تستخدم أدوات الـ AI، وبتحل بيها المشاكل اللي بتقابلك أغلب الوقت.
6. لو ظهرتلك مشكلة في موضوع إنت ماعندكش فكرة عنه، بتعرف تقرا وتتعلم أساسياته وإنت شغال.
7. ودي أهم نقطة: إنك تتعلم إزاي تقدم نفسك وشغلك.

دي بعض النقط اللي لاحظتها في الأسئلة اللي بتيجيلي عن الموضوع ده، لأني لقيت ناس مستواها كويس جداً، لكن مشكلتها كلها في الخوف وعدم الثقة بس.

وفي الآخر، خليك متأكد إن محدش بيبقى جاهز 100%، لكن في أساسيات تخليك تقول بثقة إنك مستعد، ومع الإنترفيوهات والرفض اللي هيجيلك هتتعلم من ده وهتحسن مستواك خطوة بخطوة.

• الـ OOP Concepts.
• الـ SOLID Principles.
• بعض أنواع الـ Design Patterns المشهورة، زي strategy، singleton، factory، adapter، facade.
• إيه هو الـ Dependency Injection؟
• تعمل إيه لو فيه API بتبعت الـ response ببطء؟ (كتبت عنها قبل كده).
• إيه هي الـ Laravel Lifecycle؟
• إيه هو الـ deferred في الـ service provider؟
• الـ DB indexing.
• إيه الطرق اللي ممكن تعمل بيها Query Optimization؟
• إيه هي الـ CORS؟
• الفرق بين Sanctum vs Passport vs JWT.
• إزاي Laravel بيطبق الـ rate limiting؟
• بعض الحاجات في Laravel، على سبيل المثال: Event system، Queuing، Caching، Concurrency.
• ممكن تتسأل عن بعض الحاجات في PestPHP، والـ Testing بشكل عام.
• إيه هي الـ Software Architecture patterns المشهورة، زي الـ Event-Driven والـ MVC مثلاً، وحاول تشوف أمثلة عليهم.
• إزاي بتستخدم الـ AI في شغلك، وإزاي بيساعدك في التاسكات والشغل اليومي.
• وبمناسبة الـ AI برده، مهم تعرف إيه هي الـ skills والـ sub-agents.

دي شوية حاجات جت في بالي بشكل عشوائي وأنا بكتب، إن شاء الله تكون مفيدة.

لما تكون عايز تضيف مشروع في البورتفوليو، ماتروحش تعمل بروجكت كامل من أوله لآخره، لأن يا إما محدش هيهتم يشوف كل التفاصيل دي، يا إما إنت هتزهق وتحبط في نص السكة. طب أعمل إيه؟

اعمل موديول صغير متقفل صح

شوف إيه الموضوع اللي عايز تطبق عليه واعمل موديول صغير. وليكن إنت ذاكرت WebSockets، اعمل شات سيستم صغير، بس الـ flow والـ implementation متقفلين صح وجاهزين. مش لازم تدخل في تفاصيل بيزنس وتعقّد الدنيا على نفسك.

يعني شوف جزء صغير من الحاجة اللي الناس بتسأل عنها واعملها وانشرها public، وارد جداً حد يكون عايز يعمل زيها ويكلمك علشان تنفذها في السيستم عنده.

فدايماً خلي في بالك إن البورتفوليو يكون فيه حاجات صغيرة بس مفيدة.

• أي AI بيحب يلت ويعجن، فلازم تراجع وراه وتختصر اللي هو كاتبه. المهم تكون موضح المعلومات الأساسية والمهمة.
• ما تكتبش أي إحصائيات في الـ CV غير لو حقيقية.
• حاول تبص بعين الشخص اللي بيراجع الـ CV: هو عايز معلومات مرتبة وبيدور على keywords معينة.
• اتأكد من اللينكات اللي حاططها.
• كل شركة اشتغلت فيها اكتب دورك كان إيه بالظبط، ونبذة بسيطة جداً عن اللي عملته.

عملت كل اللي فوق ده وزيادة ومحدش رد عليك؟ عادي جداً، لسه نصيبك ما جاش.

إنك يكون عندك شركة أو مشروع، ومعتمد اعتماد كلي على الـ juniors بس، ومفيش لا code review ولا أي technical direction واضح للتيم هو رايح فين وبيعمل إيه.

لازم يكون فيه شخص أو أكتر، على حسب حجم التيم بتاعك، يكون هو المسؤول عن الجزء ده في وجود الـ juniors، وهو اللي يوجههم.

المشكلة دي خادعة جداً، لإنها في البداية مش بتكون باينة. بالعكس، ده بيبان إن الدنيا ماشية كويس والتاسكات بتخلص، لكن لما تيجي تضيف أي حاجة جديدة تبدأ تظهر المشاكل الحقيقية.

أنا متفهم إن دلوقتي أدوات الـ AI بتسهل كتير من الشغل، لكن هي في الأول والآخر أداة محتاجة سواق يعرف يوصل بيها للحتة اللي هو عايزها، ماينفعش هي اللي تسوق.

في يوم قررت أسيب المكان ده، واكتشفت إني مش معايا مشاريع، والحال ده قعد مدة مش قصيرة. وقتها كنت محبط جداً، بس اكتشفت إن الإحباط ده طبيعي جداً، لكن في نفس الوقت محدش هيحل مشكلتي غيري.

قررت أخبط على كل الأبواب اللي محدش يتخيلها، لدرجة إني قررت أدخل Twitter، وكمان أذاكر بعض الحاجات اللي كنت مأجلها. طبعاً الموضوع مكانش سهل تماماً، بس كنت بجبر نفسي بشكل رهيب علشان أكمل في اللي بعمله.

بعد شهر تقريباً هناك، جالي عميل من على Twitter (أكتر مكان مكانش متوقع بالنسبالي)، والحمد لله اشتغلنا كذا مشروع ولسه مستمرين لحد دلوقتي.

اللي عايز أوصله لك: ماتخليش حد يقولك ماتزعلش وماتحبطش. لا، عادي، إحنا بشر، لكن مع الوقت لازم تقوم وتقف تاني، علشان معندكش اختيار تاني.

فكرة إنهم عندهم Jira tickets لكل feature حرفياً، وكل feature مكتوب ليها كل التفاصيل ومربوطة بالـ GitHub مع شوية automations كده. يعني الـ workflow اللي تشوفه تقول خلاص كده إحنا هنخترع صواريخ.

المشكلة بقى إن كل ده نظرياً حلو، لكن مع الوقت لقيت فيه شوية حاجات بوظت كل حاجة، وخلت جودة الشغل تطلع مش حلوة ومتأخرة كمان.

1. الضغط الغير مبرر

كل تاسك بالنسبالهم urgent ولازم تخلص في يوميها. وده مش مجرد بيخلي الشغل يتسلم أي كلام، لكن خلى البيئة نفسها وحشة جداً بين الناس، ومحدش طايق التاني فعلاً، لدرجة إنهم كانوا ممكن يبعتوا الساعة 2 بالليل عادي جداً علشان فيه تعديلات جت من العميل فجأة!

برغم كل ده، التيم ده كان من أشطر الناس اللي اتعاملت معاهم، وفيه منهم اللي اتعاملت معاهم برة الشركة دي في مشاريع تانية، ونجحت والدنيا مشيت كويس.

2. ديدلاينز مش منطقية

دي التفصيلة اللي كانت مبهدلة الدنيا، وكانت الكارثة بالنسبالي: كل التاسكات كان ليها ديدلاين مش منطقي، ولما بتتكلم تكتشف إنهم اتفقوا مع العميل على التسليم في المواعيد دي. وده مكانش مرة، لكن كانت كل التاسكات!

3. Project manager دوره سؤال any updates

كان فيه Project manager كل دوره إنه يبعتلنا any updates؟ ودايماً يحسسك بالتقصير. ومش محتاجين نوضح النقطة دي أكتر من كده.

4. مفيش تقدير

الوقت اللي كنا بنسهر فيه ونسلم فيه بجودة كويسة وفي المواعيد المظبوطة، مكانش فيه بعده أي نوع من أنواع التقدير المعنوي حتى، رغم إننا اشتغلنا برة الأوقات اللي متفقين عليها، وخصوصاً اللي كانوا زي حالاتي مش full time، لكن كنا ماضيين عقد بيتجدد مع الوقت.

اللي عايزك تطلع بيه

فيه تفاصيل تانية بين السطور، لكن ده اللي جه في بالي أشاركه معاكم. واللي عايزك تطلع بيه من المقال ده حاجة واحدة بس: مش التنظيم لوحده اللي بينجّح المشروع، حتى لو كنت منظم كل حاجة 100%. لازم البيئة بين الناس تكون كويسة على المستوى الشخصي، لإننا بشر، والتفاصيل الصغيرة والتقدير بيفرقوا فوق ما إنت متخيل مع أي حد.

1. ليه أعمل محتوى أصلاً؟

لازم تفكر إنت بتعمل ده ليه؟ لأن لو هدفك تجيب عميل بعد شهر فغالباً هتحبط وتزهق. لازم تبقى حاطط هدف واضح، وتشوف إنت بتقدم إيه وعايز الناس تعرفك بيه، علشان تبقى عارف هتكلم مين.

2. الريتش مش مقياس

أغلب العملاء ممكن يكونوا مش بيتفاعلوا معاك ولا مرة على أي محتوى، لكن هما متابعينك كويس، وأي حاجة تيجي في بالهم عن مجالك هتكون إنت أول شخص يكلموه.

3. مينفعش تبيع

ماتخليش هدف المحتوى بتاعك دايماً إنك تبيع للعميل. محدش فينا بيحب إن حد يبيع له، رغم إني عايز أشتري. بس ممكن تعملها بطريقة فيها حرفنة، زي إنك تدخّل العميل في عملية البيع بشكل غير مباشر وعلى المدى الطويل.

بمعنى؟ إنك تكون بتحرك العميل ناحية حتة معينة من الخدمة أو المنتج بتاعك من غير ما تجبره على ده. العميل لما يشوف إنك بتقدم كل ده في المجال بتاعك مجاناً، هيقول: أومال خبرته نفسها هتكون عاملة إزاي؟ بس مهم أوي تعمل ده بشكل صادق علشان تفيد وتستفيد.

لكن ده مايمنعش إنك من وقت للتاني تنشر إنجازاتك، علشان ده بيقوّي الثقة جداً بينك وبين الناس.

4. علّم الناس حاجة

عامل المحتوى بتاعك كأنك بتفتح علاقة صداقة شخصية بينك وبين العميل، علشان كده هو اسمه Personal Brand. وفي المرحلة دي طبيعي يكون هدفك إنك تبني ثقة مع العميل، وده بيتم عن طريق أكتر من حاجة:

• إنك تعلّم العميل حاجة تساعده في شغله.
• تنوّرله فكرة مكانتش في باله.
• أو إنك تاخد الموضوع في سكة تانية، زي مثلاً تعلّم الناس في مجالك معلومات تساعدهم وتنقلهم خبرتك.

وهنا مش بقول إنك تعمل ده بغرض التسويق بس. المهم تخصص جزء من وقتك في إنك تعلّم الناس معلومات مفيدة مهما كنت شايفها بسيطة، الناس محتاجاها.

5. لازم تتكلم بأسلوبك إنت

بنشوف دلوقتي بوستات مكتوبة بالـ AI، بس ليه ده بيضرك جداً؟

تخيل معايا إنك بتكتب بوستات من مصادر مختلفة في مواضيع مختلفة، بعد مدة البروفايل بتاعك هيكون ملهوش هوية، ولا الناس هتبقى عارفة طريقتك.

كمان مينفعش أروح أجيب شوية معلومات وأحطها في بوست وأقول أنا بعمل محتوى. لازم تنقل خبرتك وتجاربك.

6. ماتستعجلش

لما تبدأ تكتب محتوى، ماتبصش على النتايج وتستعجل. إنت بتبني ثقة، وده بياخد وقت طويل، لكن وقت ما الثقة دي هتكون موجودة هتبقى عملت لنفسك positioning قوي في مجالك.

7. ماتتكسفش

ناس كتير بتتكسف تظهر قدام الناس. أحب أصدمك: إنك لو فضلت مكسوف مش هتعمل حاجة ولا هتتحرك. انشر محتوى واغلط عادي، محدش مهتم!

8. جرّب كتير

شوف إيه نوعية المحتوى اللي بتعمله بمجهود قليل من غير ما تحس إنه عبء عليك، حتى لو هتبدأ بإنك تعمل كومنتات على بوستات، بس تكون بتقدم حاجة مفيدة فعلاً.

9. تكون مستعد للي هيشتري

طب أنا عملت كل ده وفيه عملاء بدأت تيجي تسألني، لكن بيمشوا بعدها، أعمل إيه؟

هنا إنت فعلاً عرفت تقنع العميل بيك، لكن معرفتش تقفل البيعة معاه. فلازم تكون محضّر للمرحلة دي كويس، زي ويب سايت تعرض عليه خدماتك، بروفايل قوي يوضح خبرتك، أو حتى Packages سهل يشتريها.

أسوأ حاجة إن العميل يبقى جاهز يشتري لكن إنت مش جاهز تبيع!

في النهاية، لو وصلت لحد هنا فأنا بشكرك جداً على وقتك. المقال طويل، لكن حبيت أشارك معاكم بعض التجارب اللي أنا مرّيت بيها السنين اللي فاتت، وإن شاء الله الفترة الجاية هنتكلم عن كل نقطة منهم بشوية تجارب وأمثلة توضحلك الفكرة وتسهّلها عليك أكتر.

خليني أجاوبك إجابة قصيرة في الأول: محدش يقدر يأكدلك أي حاجة، لأن المجال ده دايماً متغير، من زمان مش من دلوقتي بس.

من حوالي 10 أو 15 سنة كده كانوا بيقولوا إن الـ PHP بتموت، وناس كتير وقتها كانت بتسأل تستاهل أتعلمها ولا لأ، وغالباً الناس دي لسه بتسأل السؤال ده لحد دلوقتي!

وقتها ظهرت Laravel اللي غيرت قواعد اللعبة (غيرتها بجد مش ألش)، واللغة بدأت تنتشر تاني وتظهر منها نسخ جديدة والطلب عليها زاد. وقتها اللي كان مكمل في المجال هو اللي عرف يثبت نفسه، واللي فضل يسأل قعد يسأل سنين من غير أي فعل.

الفكرة إنك ماتسمعش الكلام اللي بيتقال في الجروبات، أو حد يقولك المجال هيختفي أو حتى هيزيد الطلب عليه، لأن مفيش حاجة مؤكدة.

لكن المؤكد إنك لو تعبت واجتهدت واستثمرت في دماغك وتعليمك، ربنا هيكرمك. ولو لا قدر الله المجال حصل له حاجة، هتعرف تختار الطريق المناسب ليك وقتها. فدلوقتي اعمل المتاح واللي في مقدرتك وبس.

هنفترض إنك شغال بفريم ورك معين، وليكن مثلاً Laravel. روح على الـ GitHub repo بتاعه وابدأ شوف كده طريقة كتابة الكود والدنيا هناك ماشية إزاي، والـ issues اللي موجودة بتتحل إزاي، وهكذا.

في الأول الدنيا هتبقى ضلمة

الدنيا في الأول هتكون ضلمة ومش شايف أي حاجة، بس كمل زي ما إنت. وخلي دايماً جنبك ChatGPT (أو أي AI Model بتحبه)، واسأله عن الكود اللي إنت مش فاهمه وخليه يشرحهولك، واتكلم معاه كإنه صاحبك كده.

مرة ورا التانية الخيوط هتتربط

مرة في التانية هتلاقي حتت في دماغك نوّرت والخيوط بدأت تتربط ببعض. غير إنك هتشوف الاستخدام الفعلي للـ Design Patterns اللي دايماً بنتكلم عنها، وهتعرف بنستخدمها إمتى وإزاي بتحل المشاكل.

كمان هتعرف الحاجات اللي إنت بتستخدمها في Laravel كل يوم تقريباً، زي الـ Event Listener، معمولة إزاي، من زاوية إنت ما شوفتهاش قبل كده.

الموضوع صعب مش سهل، بس استمر فيه وهتلاقي نتايج مبهرة، وهتفرق فعلاً في طريقة تفكيرك ومستواك.

الحاجة اللي بجد هتفرق معاك هي إن يكون عندك مشكلة أو feature عايز تعملها، وتسأله عنها وتشوف هيشرحهالك إزاي (حتى لو مش تكنكال). المهم تفهم بيفكر إزاي، وإيه الاقتراحات اللي بيقدمهالك.

وعلى فكرة مش شرط خالص يطلع بحل في وقتها، لكن تشوف طريقته للوصول للحل ده عاملة إزاي، وهل فهم المشكلة فعلاً ولا مجرد بيجاري الكلام وخلاص.

بصراحة دي من أكتر النقط اللي بهتم بيها لما بعيّن حد معايا: إزاي بيفكر في حل المشكلة. لأن حالياً التنفيذ بقى سهل، لكن التفكير في مخرج لمشكلة هو ده التحدي فعلاً.

لغة التواصل بينكم

حاجة كمان: ممكن يكون طريقته في التفكير كويسة، لكن مفيش لغة تواصل بينكم، وللأسف في ناس كتير بتكتشف ده بعد مدة من الشغل. فده هيوفر عليك كتير في البداية، وتبقى عارف الشخص وطريقته من قبل أي شغل أو اتفاق بينكم.

لازم تفكر وتشوف إنت بتبيع لمين وعايز تكلم مين، وتبدأ تتفاعل مع الناس دي.

الكومنتات مهمة

وهقولك على حاجة كمان: LinkedIn بيهتم بالكومنتات يمكن أكتر من البوستات. علشان كده لما بتعلق عند حد، التعليق ده بيظهر للـ network عندك كلها. وطبعاً مش محتاج أقول إن الكومنت لازم يكون بيضيف حاجة، مش مجرد كلام وخلاص.

فدايماً اهتم بالتفاعل مع الناس اللي محتمل تشتري منك، مش بس زمايلك. رغم إن زمايلك ممكن يجيبوا ناس تشتري منك (وده اللي بيحصل أحياناً معايا)، لكن ده صدفة مينفعش تعتمد عليها بس.

خصوصاً إني كنت عامل حركة ضيعت مني فرص كتير، وهي إني كنت عامل الواتس اب لكل حاجة، شغل وغير شغل.

حالياً فصلت، وبقيت مهتم بالـ WhatsApp Business أكتر، وبشير عليه حاجات تخص شغلي دايماً. وفعلاً ده خلى العملاء اللي اتعاملت معاهم يرجعولي تاني، حتى ولو استشارات سريعة، لإن بقى فيه لغة تواصل أقرب بكتير من السوشيال ميديا.

وفعلياً مانصحش حد أبداً يعمل واتس اب واحد لكل حاجة (غالباً أنا الوحيد اللي كنت عامل كده).

الفترة اللي فاتت شوفت ناس شغالين فرونت إند، لكن علشان يخلصوا تاسكاتهم بيعدلوا في ملفات الباك إند (والعكس صحيح). طبعاً ده بيزود الـ load على تيم الباك إند علشان يعملوا review على اللي اتعمل، غير إن على المدى البعيد ده هيعمل مشاكل كتير في الكود.

فالحل إن يكون فيه restrictions واضحة إن محدش يعدل في حاجة هي خارج نطاق شغله وخبرته، ولو حصل لأي سبب من الأسباب، لازم يكون فيه review مفصل لأي حاجة بتتكتب.

واللي اكتشفته إن فيه مشكلة واحدة مشتركة بينهم كلهم تقريباً، وهي إن مفيش code review بيتم بعد ما بيخلص شغله. بيخلص التاسك ويرفعها ويتعملها تست وخلاص، لكن مفيش حد بيقوله:

• الكود ده صح ولا غلط؟
• ممكن يعمل مشاكل إيه بعد كده؟
• هل ده التطبيق الصح للتاسك ولا فيه طرق أحسن؟

علشان كده حبيت أركز مع الناس اللي معايا على الجزء ده، لإني شايف إنه دايماً بيشيل مشاكل كتير متوقعة بعدين إحنا في غنى عنها. وبصراحة بعترف إني رخم شوية في الموضوع ومش بعدّي حاجة بسهولة.

لكن الصبح اكتشفت إني جالي فيدباك فرحني جداً فعلاً من شخص شاطر معايا، وما شاء الله الكود بتاعه كويس، لكن فيه حاجات صغيرة بين السطور ممكن مع الوقت تعمل مشاكل كتير، وده اللي إحنا شغالين عليه مع بعض حالياً.

فنصيحة لأي developer أو حتى business owner: اهتموا بالـ Code Review. هو آه بياخد وقت، وممكن يبقى ممل في الأول، لكن العائد بتاعه كبير جداً على جودة الشغل واستقرار المشروع.

أهم نقطة في ده كله، إنك تقوله: من خلال معلوماتك عني، حاول تربط المقال ده بشغلي وإزاي أطبقه في شغلي اليومي. هنا إنت حولت المقالة من مجرد شوية معلومات لحاجات فعلاً ممكن تطبقها كل يوم تقريباً.

الجميل في الموضوع ده كمان إنه مش بس هيلخصلك المقال، إنت كمان فتحت شات ممكن تقعد تسأله عن أي استفسار يجي في بالك في المقال، وهو هيوضحهولك وهيشرحه بالتفاصيل.

بعد مدة صغيرة، هتلاقي عندك knowledge base محترمة جداً هتسعفك في أي وقت.

علشان كده في المقال ده حابب أتكلم عن بعض النقط اللي تاخد بالك منها لما تبدأ مشروع مع شركة، علشان تضمن إن عملية الـ development تمشي كويس وتستلم اللي إنت متوقعه بالظبط في الوقت المتفق عليه:

• تحديد الـ scope بالظبط. للأسف أغلب الناس بتبقى مش محددة متطلباتها، أو بتكون متطلبات عامة زي "عايز أعمل زي الويب سايت الفلاني"، وده في حد ذاته بيعمل مشكلة لأن مفيش اتفاق واضح من البداية. فلازم الطرفين يكونوا متفقين إيه الـ features اللي هتشتغلوا عليها بالظبط.
• أهم من إنك تشوف مشاريع الشركة وبس، إنك تتناقش معاهم عن المشاكل اللي متوقع تكون في المشروع أو اللي قلقاك وعايز لها ردود واضحة، علشان تطمن إن الشركة قادرة تحل المشكلة دي بطريقة مناسبة لمشروعك.
• مهم جداً تحددوا مع بعض من البداية طريقة ومواعيد التواصل، لأن كتير جداً من العقود مش بتكمل مش علشان الجودة، لكن علشان طريقة التواصل صعبة ومحدش عارف يوصل للتاني بسهولة.
• لازم العقد يكون شامل الحاجات اللي هتستلمها، زي السورس كود، أو الصيانة هتكون قد إيه بعد التسليم.
• برضه العقد لازم يكون موضح الدفعات إمتى بالظبط، ولو فيه شروط قبل الدفعة تتكتب ويتوافق عليها من الطرفين. مينفعش الموضوع يكون مش متحدد أو مش واضح من البداية.
• من المهم جداً إنك تكون عارف الـ stack والأدوات اللي هيستخدموها في المشروع من أول يوم. حتى لو إنت شخص مش technical، لازم يكون عندك documentation فيه الكلام ده.
• في النهاية برضه لازم تستلم API documentation أو User Guide للمشروع، علشان لو عرضته على حد بعد كده يكون فاهم المشروع بيعمل إيه.

لو فيه أي جزئية من دول مش واضحة وحابب تستفسر عنها، هكون سعيد جداً نتناقش مع بعض بشكل أكبر.

حبيت أحل المشكلة وفكرت في كذا حل، زي مثلاً إني أستخدم أداة زي Linear، بس اللي بلاحظه إن بعد كام يوم العميل مش بيفتح الصفحة تاني ومش بيتابع عليها.

علشان كده وصلت لحل جديد: كل application بشتغل عليه بعمل صفحة بسيطة بس منظمة، فيها كل الـ modules اللي المفروض نشتغل عليها وإيه حالتها، وبربط ده على دومين الـ application، وليكن status.application.com.

على قد ما هي فكرة تبان بسيطة، لكن وفرت كتير جداً علينا. كمان تقدر تعمل Rule جوه أي AI tool إنت شغال عليها، إنها تعمل update على الصفحة دي بعد أي تاسك تخلصها.

برضه ممكن تكتب في الصفحة دي أي blocker أو إيه اللي محتاجه من العميل، زي مثلاً AWS Credentials، Mail Service API Token، بحيث كل حاجة تخص الـ development phase تبقى واضحة ومتجمعة في مكان واحد.

مؤخراً بدأت أطور الفكرة، إن لو فيه أي تاسك محتاجة reminder تقدر تعمل ده من نفس الدومين، إنها تبعت إيميلات أو notification معينة بأي محتوى محتاجه.

الفكرة بالنسبالي إني مش بحب أتابع على أكتر من tool، وبحب دايماً إن كل حاجة تكون متجمعة في مكان واحد قدر الإمكان.

طول الأسبوع بنكون شغالين على مشاريع وتاسكات بشكل عشوائي، فجأة بتلاقي الميل اتملى رسايل، وفولدر الـ downloads بقى مليان سكرينات وحاجات إنت خلصتها، وطبعاً فيه passwords بتنسى تسجلها عندك، فتضطر ترجعلها وتدور عليها كل مرة.

حاول في الساعة دي:

• تنضف كل الكلام ده.
• تستخدم الـ tool المناسبة علشان تسجل الحاجات اللي بتحتاجها أثناء الشغل.
• لو قدرت تعمل automation لتاسكات إنت بتعملها بشكل دايم، هيوفر عليك ساعات أثناء الأسبوع.

بالعكس، ناس كتير منهم بيكونوا شاطرين والكود بتاعهم بالنسبة لعدد سنين خبرتهم كويس، لكن معظمهم بيخاف من فكرة إنه يعرض الكود على حد يراجعه، خصوصاً لو ده محصلش معاه قبل كده في الأماكن اللي اشتغل فيها، خوفاً من الـ feedback اللي هيجيله.

دي يمكن من الحاجات اللي اتعلمتها مؤخراً: إزاي إنت كـ mentor ليهم تدعمهم نفسياً ومعنوياً، وتحاول تحتوي أخطاءه بشكل ما يفقدهوش الثقة في نفسه.

الفكرة دي جاتلي من حد معايا شاطر جداً وبيعرف يجيب المعلومة لو وفرتله ظروف مناسبة. في أغلب الأيام كان بيخلص اللي عليه بدري، لكن كان عنده مشكلة إنه متردد يرفع الكود علشان أراجعه، وكنا لازم نعمل ميتنج يومياً تقريباً علشان نراجع الكود قبل ما يعمل PR، علشان يتأكد إنه تمام.

مع الوقت لاحظت ده، وخليت الـ review دايماً يتم بعد ما بيعمل submit للكود، علشان أكسر عنده حتة الرهبة، لحد ما بقى متقبل فكرة الـ feedback اللي بتجيله.

واللي خدت بالي منه كمان إن طريقة كتابته للكود اختلفت، عكس الفترة الأولى اللي كان بيرفع الكود فيها لمجرد إنه يخلص منه وخلاص!

علشان كده بقيت دايماً أهتم بالجانب النفسي قدر الإمكان، وأعرّفه إننا في ظروف المفروض يغلط فيها ويتعلم من غلطاته، علشان يتجنب ده في الشغل الحقيقي بعد كده.

طب إزاي تتعامل مع الضغط اللي بيحصل فجأة ده، واللي بيخليك تنفجر؟

للأسف وقتها بنلاقي نفسنا دخلنا في حالة توتر، وده بيخلينا لا عارفين نشتغل ولا عارفين نرمي كل ده ونرتاح.

الحل اللي نفع معايا فعلاً، ويمكن ينفع معاك: إنك تسيب كل ده وتقوم تعمل أي حاجة، حتى لو هتقف في البلكونة من غير موبايل.

دماغك ساعتها هتقنعك إنه لا ومفيش وقت، لكن بالعكس، الوقت ده هو اللي هيخليك تنظم الدنيا عندك قبل ما تنفجر، وتعرف إمتى ولمين تقول لا، وإيه الحاجات اللي ليها الأولوية. ولو عرفت تنام نص ساعة يا ريت، بس نص ساعة بس. بس خد بالك، موضوع النوم في الوقت ده عايز أعصاب جامدة شوية.

المشكلة إننا بنستجيب للضغط ده وبنسحل دماغنا، وفي الآخر الوقت بيضيع في اللاشيء، وبرضه مفيش حاجة بتتعمل، ولو اتعملت الجودة بتطلع سيئة جداً.

لقيت Claude بيقولي والله Codex الكود بتاعه أحسن بكتير، وبعدها Codex قالي أنا الكود بتاعي مايجيش حاجة جنب Claude. وقتها حسيت إنها نفس المقارنة بين الفنان كمال أبو رية وبهاء سلطان.

الخلاصة بالنسبالي "لحد دلوقتي"

• Claude كويس معايا في المشاريع اللي فيها تعديلات كتير، بس بطيء جداً وبيحرق tokens كتير.
• Codex كويس لو عايز تنجز task سريعة كده، بس محتاج تراجع وراه شوية.

ولسه جاري التجارب، لإن كل يوم الوضع بيختلف عن التاني للأسف!

مانكرش إن في البداية الموضوع كان بيضايقني، لإن ده كان شغلي. لكن حاولت أفكر إن خلاص ده الوضع الجديد اللي الواحد لازم يتعامل معاه.

وفعلاً في النهاية، نسبة كبيرة من العملاء بدأت ترجعلي تاني بعد ما خلصوا جزء من الشغل اللي هما عايزينه، وبدأنا نكمل عليه مع بعض.

المهم إن في النهاية تكون الأطراف كلها مبسوطة وراضية.

أنا متفهم إن فيه أوقات الدنيا بتبقى مريحة، لكن هل الوضع ده هيفضل كده طول الوقت؟

هنفترض إنك قدرت توفر فعلاً 16 ساعة شغل يومياً، هل هيبقوا بنفس الكفاءة؟ ولو عملتها يوم، هتعرف تعملها على طول؟ استحالة. يبقى إنت بتضحك على نفسك وعليهم.

الحل إنك لما تيجي تتفاوض مع شركة، تطلب المرتب المُرضي ليك واللي يغنيك عن أي حاجة جانبية، غير كده بلاش تقبل الـ offer من البداية.

لو إنت حالياً شغال freelancer على مشاريع صغيرة أو متوسطة، بنصحك جداً إنك تستثمر في العلاقات، وتحاول تكبر وتعلي السقف بتاعك في إزاي تعمل شراكات بشكل مستمر مع startups.

دي أكتر حاجة فرقت معايا أنا شخصياً: إنك تكون المسئول عن الجانب التقني كامل لشركات في قطاعات برة السوفت وير. الموضوع بينقل البيزنس والتيم بتاعك لمكان أفضل بكتير من إنك تكون شغال على مشاريع بسيطة.

ولو إن ده حلو في مرحلة من المراحل، بس علشان تكبر لازم تستثمر في العلاقات والشراكات دايماً.

خلينا متفقين إن مفيش قاعدة أقولك عليها هتخلي العملاء تجيلك. إنت دورك إنك بتفتح أبواب لنفسك في المستقبل، عن طريق إنك بتوسع دايرة معارفك بحضور الإيفنتات أو الـ networking على LinkedIn (بالمناسبة ده منجم دهب). المهم إنك تعرّف الناس إنت بتعمل إيه وخبرتك في مجال إيه.

حاول من وقت للتاني تشير حاجات من شغلك، زي مثلاً مشكلة قابلتها في أبلكيشن كنت بتعمله وإزاي حليتها. وقتها ممكن يكون حد بيواجه نفس المشكلة فيكلمك، وهكذا.

مفيش طريق واضح للموضوع ده غير المحاولات في كذا اتجاه، لكن لازم تبقى عارف إن ده بياخد وقت وصبر علشان تشوف نتايج كويسة.

التجربة مع الـ fulltime

السنة اللي فاتت مريت بكذا تجربة سيئة جداً لما بشتغل مع حد يكون شغال fulltime في شركة. السبب إن المشروع بيكون أقل أولوية له، وفي الأغلب بيكون مديله ساعة ولا ساعتين بعد شغله اللي بيرجع منه مش شايف قدامه.

غير طبعاً إن التواصل بيكون صعب جداً الأوقات دي، وبيعتمد إنه هيشتغل في الويك إند. ولما الـ QA بيدخل يتست، مانلحقش نخلص في الويك إند، وندخل في نفس الدوامة.

الفرق مع الـ freelancers

لما بدأت أعتمد على الـ freelancers، الموضوع بقى دايماً مرن جداً بينا، لأن المشروع هو أولوية بالنسباله ومصدر دخله، فبيكون محافظ عليه جداً، وطريقة التواصل والشغل بتختلف تماماً.

• ماتخليش Opus يعمل كل حاجة. هو شاطر جداً في التخطيط وبيخرجلك plan مفصلة بالسطور اللي المفروض يعدل عليها، وقتها خلي Sonnet ينفذها ووفر شوية tokens.
• لما الـ plan تخلص وقبل ما تنفذها، خلي أي LLM يراجعها ويطلعلك الـ gaps اللي فيها. أنا جربت الموضوع ده بـ Codex وكان ممتاز جداً، reviewer رخم فعلاً.
• الخطوة اللي دايماً هقولك عليها: لازم تبص على اللي بيتعمل وتراجع عليه كويس علشان مانتفاجئش كلنا.
• لو هتعدل على الـ UI بلاش تستخدم Opus كتير، علشان فايلات الـ HTML/CSS كبيرة وبتحرق tokens كتير جداً، وقتها Sonnet أو Codex ممتازين.
• ماتنفذش feature كبيرة مرة واحدة. قطعها لأجزاء منطقية زي مثلاً DB migrations، logic implementation، views وهكذا.
• لازم تستخدم الـ skills وتفهمها كويس علشان تعمله guidelines قوية مايخرجش عنها، سواء في الـ clean architecture أو الـ security وغيرهم.
• (للي بيستخدم Claude) استخدم plugin اسمها feature-dev، بتخططلك كل اللي إنت عايزه قبل ما تكتب أي كود.

العميل لما بيكلمك بيكون في الغالب عنده فكرة عايز ينفذها، وفي أوقات كتير بتكون الفكرة لسه بيدرسها من كذا جانب. الغلطة اللي بنقع فيها كمبرمجين إننا بنبدأ نفكر في التنفيذ من بدري أوي، ومش هو ده الصح.

في المرحلة دي المفروض العميل يكون حاسس إنك شريكه، بتفكر معاه وتقوله وجهة نظرك، اللي هيكون جزء منها تكنكال طبعاً، مع خلاصة خبرتك في المشاريع اللي عملتها وتشبه الفكرة دي.

عايز أقولك إن في المرحلة دي نسبة إنك تلغي أو تضيف features بتكون عالية جداً، وده بيقلل احتمالية الخناقات اللي بتحصل في الآخر، إن العميل يقولك مش ده اللي عايزه. رغم إن ده ممكن يكون اللي اتفقتوا عليه، لكن هو كان متخيله حاجة تانية، ولما اتنفذ على أرض الواقع مكانش متوقع ده.

أفتكر مرة كنت بتناقش مع عميل وكان عنده فكرة قوية جداً، لكن كان مقرر يستخدم منتج جاهز وإحنا نعدّله. بعد مناقشات طويلة لقينا إن المنتج ده مش هيخدم فكرته في المستقبل في بعض الحالات، وقتها قررنا إننا نعمل الفكرة من الصفر، ونستخدم بعض الحاجات الجاهزة في الجوانب اللي مش أساسية أو مش core بالنسبة للبيزنس بتاعه.

علشان كده دايماً بشوف إن المرحلة دي بتخدم الـ freelancer وتخلي البيزنس بتاعه مختلف ويعيش لسنين قدام، مش مجرد بيعمل مشروع وخلاص. وبرضه بتساعد العميل إنه يشوف فكرته في المستقبل بناءً على خبرة الـ freelancer اللي معاه.

إنت والعميل بقالكم مدة طويلة بتبنوا المنتج وبتجربوه، لكن البداية الحقيقية هي دخول أول مستخدم. تجربة استخدامه مختلفة تماماً عن اللي حصل أثناء فترة التطوير والاختبار.

علشان كده اللي هيفرق معاك جداً إنك تقعد مع العميل وتبقوا حاطين خطة واضحة لفترة الصيانة وعارفين هتمشي إزاي، لإن دي الخط الفاصل بين المنتج وبين الاستخدام الحقيقي.

مثال بسيط

مع أول مستخدم ممكن تكتشف إنك محتاج تغير التكست أو طريقة الكلام علشان تبقى واضحة وسهلة له. حاجة زي كده تعديلها مش بياخد ثواني، لكن تأثيرها على البيزنس كبير جداً، والتفاصيل الصغيرة دي يمكن مش بتبان أثناء التطوير.

علشان كده دايماً حاول أي مشروع تسلمه تخصص له جزء من الوقت أسبوعياً للـ support، علشان تقدر تقول إنك قفلته وسلمته بالشكل المظبوط.

حالياً بيجيلي عملاء عاملين prototype للفكرة بتاعتهم على Claude أو Lovable، وبندخل ميتنج نجرب المنتج كإنه نهائي. ده بيوفر عليا وقت كبير جداً في إني أفهم الفكرة، والموضوع بيكون أمتع بكتير بصراحة من الـ documents اللي كانت أحياناً بتتفهم بشكل غلط أصلاً، وده كان بيضيع مننا وقت. غير إن فيه ناس بتخلص حوالي 80% من الفكرة فعلاً.

المشكلة فين؟

المشكلة بتيجي بعد كده، لإن ماينفعش خالص بالكود ده تطلع production وتستنى ترافيك عليه. مهما كانت الأدوات دي بتطلع أشكال حلوة ومتناسقة ظاهرياً، لازم مبرمج فاهم الكود ده ويعرف إيه المشاكل اللي فيه قبل ما تتفاجئ بيها في الـ production.

هنا إنت عملت كذا حاجة: قطعت شوط كبير، ووضحت فكرتك للمبرمج اللي هيشتغل عليها من غير مجهود كبير، خصوصاً لو فكرة فيها تفاصيل كتير. وفي نفس الوقت طلعت كود كويس بإنك إديت العيش لخبازه، علشان تضمن أحسن جودة.

تجربتي لحد دلوقتي ممتازة بالـ model ده، واختصر علينا تقريباً 50% من المدة اللي كنا بنستهلكها علشان نفهم بعض وأفهم المشكلة من الأساس.

• مهما حصل عليه ضغط مايوصّلش ده للتيم (إلا نادراً، مش عمال على بطال).
• يعرف يحل أي اشتباك بين التيم.
• بيعرف يحل مشاكل الـ Git.
• دايماً يكون فاتح باب النقاش بينه وبين التيم، مش مجرد أوامر.
• يعرف يقول كلام إيجابي لما حد يعمل حاجة كويسة، من غير ما يكابر.
• يبقى عارف إنه مش عارف كل حاجة، وإنه ممكن يتعلم حاجة من أصغر حد في التيم عنده.
• بيعرف يدافع عن حقوق التيم بتاعه قدام الإدارة.
• لو حد غلط، مايفضحهوش، ويعرّفه الصح بينه وبين الشخص ده.

وأهم نقطة: لما حد من التيم يمشي يكونوا فاكرينه بالخير، مش يحسبنوا عليه لما تيجي سيرته!

اليومين اللي فاتوا سلمت مشروع كامل للعميل، معمول أغلبه بـ Claude Code بنسبة توصل لحوالي 80% من إجمالي المشروع.

طب إزاي ضمنت إن النتايج طلعت كويسة؟

قعدت يومين تقريباً أذاكر الـ skills والـ subagents اللي اتضافوا مؤخراً في Claude، وخليت أي تعديلات تتعمل تمر عليهم. وكانوا بيتضمنوا الـ checks دي باختصار كده: clean code، clean architecture، security، performance.

وعملت subagent مخصوص للـ review على كود الفرونت إند، وواحد تاني للباك، على أي تعديل يتم فيهم. غير طبعاً الـ testing لأكبر قدر من أجزاء المشروع.

دوري في البداية كان إني أقعد مع العميل وأفهم مشكلته بغض النظر عن التنفيذ، وحللنا متطلباته حتة حتة، وكتبت كل التفاصيل دي لـ Claude. ومفيش تعديل بيعمله غير لما أراجع عليه، كأن معايا حد في التيم وبعمل عليه code review رخم شوية.

حاجة كمان: عملت UI محترم جداً متفصل على متطلبات العميل في حوالي أربع ساعات بس!

الخلاصة في كام نقطة

• النتيجة كانت كويسة جداً، وسلمنا المشروع قبل الديدلاين بحوالي شهر ونص تقريباً.
• في الوقت الحالي استحالة الـ AI ياخد مكان المبرمجين، لأن لو سيبت له كل حاجة العملية هتفلت منك جامد. أيوه هيطلعلك كود شغال، بس فيه مشاكل لو ماتحلتش هتكبر مع الوقت وهتكتشفها وقت التشغيل.
• بيختصر عليك وقت رهيب لو قولتله المطلوب بالظبط.
• اعتبر الأدوات دي استثمار حتى لو غالية، النتيجة تستاهل.
• كمل في مذاكرة الأساسيات علشان هتحتاجها كل يوم عادي جداً زي قبل كده.

بحاول أجاوب على السؤال ده في معظم اللي بكتبه، علشان مريت بالحيرة دي في فترة من فترات حياتي، وحتى لما قررت أعمل mentorship program كان علشان أجاوب على السؤال ده بشكل عملي ومناسب للشخص، مش رد عام وخلاص.

المشكلة فين؟

أحياناً بنذاكر المواضيع لمجرد إنها ترند، مش علشان هنستفيد منها، أو بنعمل ليستة طويلة عريضة علشان نضمن إن كل المطلوب إحنا مذاكرينه، وللأسف الموضوع مش بيمشي كده.

برضه فيه شركات بتستغل ده علشان تنزّل الناس تدريب من غير مقابل، رغم إن الشخص ممكن ينزل شغل كـ fresh عادي ويقبض فلوس بدل ما ينزل ببلاش!

اشتغل بإيدك

إجابتي دايماً بتكون: اشتغل بإيدك في أي فكرة تجيلك، وكل حاجة هتوضح بعد كده.

• خلي أي حد يدخل بروفايلك يبقى عايز يشتغل معاك.
• أي فكرة تجيلك طبقها ونزلها على GitHub، وماتتكسفش مهما كنت عامل غلطات.
• اطلب من أي حد تثق فيه يعملك code review.
• المهم ماتسيبش فرصة غير وتستغلها.

للأسف السوق دلوقتي كله شبه بعض وفيه منافسة عالية جداً، وعلشان تبعد عن كل ده، اشتغل وطبق كتير. اللي بيظهر وبينجح فعلاً هو اللي بيفرك وبيجرب كتير، ملهاش حل تاني.

اعرف السوق عايز إيه

ادخل على LinkedIn وشوف بوستات لوظايف في مجالك، وشوف المواضيع المشتركة بينها وركز عليها. ممكن كمان تتواصل مع شركات في نفس مجالك أو مع الـ HR اللي فيها، لعل وعسى يكونوا بيوظفوا في الفترة اللي إنت سألت فيها.

بس خد بالك إنك تشوف شركات سمعتها كويسة، أو على الأقل مش الشركات اللي بتطلب الشخص يكون فاهم كل حاجة. هتتعب من البحث في الخطوة دي، لكن هتجمع معلومات محترمة عن السوق ومتطلباته.

دايماً خلي تركيزك إنك تاخد خطوات ناحية الشغل، مش مجرد مذاكرة وخلاص.

وآخر نقطة هنصحك بيها: مفيش طريق واضح هيوصلك للي إنت عايزه. دايماً حاول تسعى في كل الطرق الممكنة لحد ما تلاقي الطريق المناسب ليك.

حد هيقولي: طب ما هو ده الطبيعي. للأسف لا، معظمنا كمبرمجين بنتكلم من وجهة نظرنا بس. يعني بنقوله إننا هنستخدم أحدث technologies نزلت في السوق، وهنطبقلك الـ Clean Code زي ما Robert Martin بيقول، لكن كل ده مش هيفرق معاه نهائي.

دايماً لما تقابل عميل حاول تبص بعينه هو، شوف إيه المشكلة اللي عنده بالظبط وإزاي هتحلها. غالباً هتلاقي الموضوع أسهل ما إنت متخيل.

أول ما بدأت فري لانسنج زمان، لما كنت أعرض على العميل أحدث حاجة نزلت وقتها، مكنتش بلاقي الانبهار اللي أنا مستنيه، وده كنت بستغربه جداً. لكن مع الوقت والتجربة فهمت ده، وفرق معايا كتير في تقفيل الـ deals.

غير الشخص التاني، اللي حتى لو إجابته صح، بتكون بطريقة أكاديمية أوي ومختصرة، وأحياناً كتير مابيكونش عارف يعبر عن شغله كويس.

اللي عايز أوصله: مش شرط تكون شاطر بس، لكن لازم برضه تبقى عارف إزاي تسوق لشغلك كويس.

في المهام اليومية

1. ممكن يساعدك إنك تعمل presentation بشكل professional في وقت قصير.
2. يساعدك تخطط يومك، وتقدر تتعامل معاه كإنه السكرتير الخاص بيك.
3. يساعدك في الرد على الإيميلات.
4. تخليه يصلح الأخطاء الإملائية ويساعدك في الكتابة، لكن ماتخليهوش يكتب مكانك، مجرد تنسيق وتظبيط شكل البوست أو يقترح عليك أفكار.
5. ممكن تتكلم معاه في مشكلة، ويساعدك ويقترح بعض الحلول اللي ممكن تكون مفيدة فعلاً.

في المهام البرمجية

1. بينفذ tasks مكانك، ويخليك تركز في حاجات تانية زي الـ architecture والـ DB design مثلاً.
2. ممكن تعمل بيه موقع كامل ليك بالشكل اللي إنت عايزه ببلاش تقريباً.
3. يلخصلك كتب ويشرحهالك باللغة اللي إنت عايزها.
4. يساعدك في الـ deployment على الـ server.
5. يراجع الكود ويعملك code review ويقترح عليك تحسينات.
6. يساعدك تكتب documentation مفصل في وقت قليل.

أنا طبعاً كتبت الحاجات اللي أنا بعملها بشكل شبه يومي، لكن فيه حاجات كتير جداً ممكن تتعمل وتزود إنتاجيتك في الشغل وبرة الشغل.

المهم ماتقلقش، مش هياخد مكاننا. بالعكس، هيزود قيمتك في السوق لو عرفت تستغل ده صح.

"العميل دايماً بيحب اللي يسمعه للآخر، حتى لو اللي بقوله ماينفعش يتعمل أو مش منطقي، لكن اسمعني وفي الآخر ناقشني."

أحياناً بنسبق اللي قدامنا بخطوة، وبنبقى متوقعين اللي هيتقال، ولو مش منطقي بنرفض من قبل حتى ما يكمل الجملة. وده بيدي انطباع سيئ جداً، حتى لو ماقالكش ده في وشك.

فدايماً حاول تسمع أكتر ما تتكلم عموماً، وخصوصاً في الشغل.

لو وقتها قبلت المشروع على الوضع ده، اعرف إنك عاجلاً أم آجلاً هتلبس في حيط، إنت والعميل، والموضوع ينتهي بمشاكل كتير.

مينفعش خالص الـ requirements كلها تتختزل في فكرة إننا عايزين نعمل شبه المنصة الفلانية. الجملة دي بتسبب مشاكل كتير بين العميل والديفلوبر، لإن المطلوب مابيكونش واضح، ومفيش حد بيعمل clone 100%. لازم يكون فيه تغييرات واختلافات، وأحياناً ده بيستهلك وقت أكتر بكتير من المتوقع.

الحل

لازم تقعد مع العميل مدة تفهم هو عايز إيه بالظبط، وتكتب كل المميزات اللي هتشتغلوا عليها. ماتسيبش أبداً الموضوع مفتوح.

علشان كده دايماً بشوف إن مرحلة الـ analysis لازم نديها وقتها، علشان نتجنب المشاكل اللي بتحصل بسبب عدم وضوح المطلوب من البداية، لإن ده هيوفر وقت وفلوس كتير بعد كده.

للأسف، فيه شركات كتير بتختار التكنولوجيا بناءً على عامل واحد: الـ developers اللي عندنا شغالين بيها. وده عامل مهم، بس مش كفاية.

العوامل اللي لازم تدرسها قبل ما تختار

1. نوع المشروع: هل هو realtime؟ ولا dashboard؟ ولا مجرد CRUD؟
2. عدد المستخدمين: منصة بيقضوا عليها فترة طويلة؟ ولا مجرد action ويمشوا؟
3. تكلفة الاستضافة: فيه تقنيات تكلفتها أعلى بكتير من اللي المشروع محتاجه فعلياً.
4. توافر الـ developers: هل هتلاقي ناس بسهولة لو حبيت تكبّر التيم؟
5. سهولة الـ integration مع الـ third-party services.
6. الـ learning curve: هل التيم جاهز يتعلم التكنولوجيا الجديدة؟
7. حجم الـ community والدعم المتاح.
8. دعم الـ AI tools: هل الـ AI tools متدربة على الـ tools اللي اخترناها وعلى علم بيها، ولا مش هنقدر نعتمد عليها؟

الأجزاء اللي غيرتها

• الـ Headline (مهم جداً)
• سكشن الـ Profile Summary
• سكشن الـ Experience

شوية tips ممكن تفيدك

• فيه ميزة إنك ممكن تعمل custom button يظهر تحت اسمك دايماً، زي إنك تظهر الـ website، فده بيعمل انتشار كويس جداً.
• حاول تبعت للناس اللي في مجالك عن الخدمات اللي بتقدمها، هتلاقي ناس بتستجيب، بس الرسالة تكون بسيطة وواضحة، ماتكونش spam.
• السيرش على LinkedIn قوي جداً، لازم تستغله صح.
• ممكن كمان لو بتقدم خدمة زي الـ mentorship تضيفها هناك، وفيه Calendly integration جاهز.
• لما تلاقي بوست فيه معلومات حاول تشارك فيه، بس تقدم قيمة، مش كومنت لمجرد إن اسمك يظهر.
• لو تقدر تشترك في LinkedIn Premium، هتلاقيه فرق معاك في حاجات زي profile views، post analytics، وغيرهم كتير.

اللي خدت بالي منه إن فيه تعديلات بسيطة، ممكن بعض الكلمات اللي تضيفها بس، وهتلاقيها عملت نتايج كبيرة فعلاً، بس لازم تديله وقت شوية وإنت بتعمل الـ updates دي.

الـ subagent في Claude Code

استخدمت الـ subagent feature في Claude Code، وهي كإنك بتوظف حد معاك بصلاحيات معينة إنت اللي بتحددها. زي مثلاً Backend Code Reviewer، وده إنت بتديله صلاحيات إنه يراجع على الكود من ناحية الحاجات اللي اتكلمنا فيها في الأول وأكتر كمان، بحيث كإن فيه حد معاك بيراجع على كل اللي اتعمل ويقولك ملاحظاته.

النتيجة

طلع كذا critical issues، واقترح عليا إزاي نحلهم علشان مايتكرروش تاني. بصراحة الخاصية دي من أكتر الحاجات اللي عجبتني لحد دلوقتي، غير إنك ممكن تعمل كذا agent بصلاحيات مختلفة وتخليهم يشتغلوا مع بعض بالتوازي.

لو داخل مشروع جديد، اعمل agent وقوله إنت محتاج إيه بالظبط، وخليه يشرحلك بالظبط اللي في المشروع.

ولو إنت بتشتغل فري لانس، وكل يوم والتاني بتشتغل في مشاريع جديدة بأفكار مختلفة، خلي الـ agent ده معاك دايماً وزود صلاحياته من وقت للتاني، هيفيدك جداً وهيوفر عليك وقت كبير.

ملحوظة: ممكن الـ agents دي تشغلها مع model قوي شوية زي Opus 4.5 اللي لسه نازل.

1. الداتا بيز

أغلب المشاكل بتيجي من هنا:

• اتأكد إن الـ DB Design مظبوط وإن الـ indexes معمولة صح.
• راجع الـ queries نفسها، هل مكتوبة بكفاءة؟
• وأهم نقطة: الـ ORM. ساعات الكويري نفسه مظبوط، لكن الـ ORM بيرجع كل الـ relations أو كل الـ attributes من غير ما تاخد بالك، وده بيأثر على الأداء جداً.

2. الكود

• ممكن تكون مستخدم data structure غلط أو عامل loops زيادة.
• الـ chunking ساعات بيتعمل غلط.
• لازم يكون عندك API Rate Limiting، ده بيمنع العميل الواحد يعمل requests كتير في وقت قليل، وبيحمي السيرفر من الـ overload.

3. السيرفر

وهنا إنت بتتأكد من الـ scalability بتاعة السيرفر، لأنه ممكن يكون هو اللي مش قادر يـ respond على عدد كبير من الطلبات، فبيهنج أو يقع. وطبعاً الموضوع ده فيه كلام كتير، بس أنا في المقال ده حبيت أكتب نبذة عن كل احتمال بس.

برضه أكيد فيه أسباب تانية، بس دي فعلياً أكتر حاجات قابلتها.

حبيت أشارك معاكم كام حاجة تاخد بالك منها، ممكن تفرق معاك:

1. لازم تهتم جداً وتشوف أنسب طريقة تقدم بيها نفسك، لأن أغلبنا مابيهتمش بالموضوع ده وبيشوف إنها حاجة بديهية، رغم إنه من أهم الحاجات في الإنترفيو.
2. ابحث عن الشركة كويس، وشوف مجال شغلهم، وحاول تشوف إنت اشتغلت في إيه زيه قبل كده، وركّز عليه في الإنترفيو.
3. ماتحاولش تفتح ChatGPT أو Google، لأن ده بيتعرف وبيدي انطباع مش حلو. جاوب من خبرتك، ولو هما سمحولك بالسيرش فبراحتك وقتها.
4. لو اتسألت عن حاجة ماتعرفهاش، قول معرفش عادي، بس ماتحاولش تبيّن إنك عارفها، لأن ده بيكون واضح. خليك صريح، واطلب منهم يقولولك الإجابة.
5. لو كان السؤال من الأسئلة اللي بتحتاج تفكير، حاول تفكر بصوت عالي، هما عايزين يعرفوا طريقة تفكيرك عاملة إزاي.
6. لو الإنترفيو أونلاين، يفضّل تفتح الكاميرا، ده بيدي انطباع كويس ويدل إنك واثق في نفسك.
7. نقطة ممكن تبان غريبة شوية، وهي إنك تدخل الإنترفيو وإنت متوقع الرفض، ده هيخليك داخل مش خسران ولا خايف من حاجة.
8. لو جالك إيميل رفض، اسأل عن سبب الرفض واشتغل عليه.
9. حضّر أسئلة ليهم عن نظام الشركة والفريق اللي هتشتغل معاه، وإيه دورك، وكل التفاصيل اللي محتاج تعرفها، لأنك إنت كمان لازم تقيّمهم وتشوف مناسبين ليك ولا لأ.
10. ماتقولش الراتب الحالي ولا المتوقع، وحاول تضغط عليهم شوية علشان تعرف متوسط الراتب المتوقع.

في الآخر، لو حابب نعمل mock interview علشان تتعود على نظام الإنترفيوهات وأهم الأسئلة اللي بتتسأل، كلمني ونتناقش في التفاصيل.

طب إزاي نحاول على قد ما نقدر نستفيد من الفترة دي؟

1. روح الجيم.
2. حاول تتعلم تعمل حاجات برة نطاق الشغل، زي ركوب الخيل أو تتعلم رياضة جديدة. حاول تخلي مخك وجسمك يتنفسوا.
3. كلم أي حد من أهلك أو صحابك بقالكم كتير ماتكلمتوش.
4. شوف أي مهارة إنت مأجلها علشان كنت مضغوط، وابدأ اتعلمها. ده هيخليك تحس بالإنجاز.
5. علّم الناس، وانشر بوستات ومقالات عن مجال شغلك.
6. احضر events، واهتم جداً بشبكة علاقاتك.
7. لو متاح معاك تسافر كام يوم في مكان جديد، برضه هيفرق معاك جداً.

مع العلم إن الحاجات دي لو عملتها، حتى لما تلاقي مشروع، هتبني عندك عادات مفيدة جداً.

الطريقة اللي نفعت معايا

قعدت مدة طويلة أحاول ألاقي طريقة أنظم بيها تاسكاتي، سواء في الشغل أو برة الشغل، ومالقيتش أي حاجة نفعت معايا غير حاجة بسيطة جداً:

1. بكتب الحاجات اللي عايز أنجزها طول الأسبوع بشكل مفصل، وبقسم التاسكات لـ MUST (الحاجات اللي لازم تتعمل) و SHOULD (الحاجات اللي المفترض تتعمل، بس مش ضرورية أوي).
2. كل يوم الصبح باختار الحاجات اللي عايز أشتغل فيها النهارده (ده طبعاً في حالة إن مفيش حاجة مستعجلة ولازم تتسلم في يوم معين).
3. بقعد آخر الأسبوع أقيّم إيه الحاجات اللي خلصتها من الليستة.

الطريقة دي نفعت معايا لأني من النوع اللي بيتشتت بسهولة، وفي نفس الوقت مخي بيرفض أي قيود عليه. فالخدعة دي بتحسس مخي إنه هو اللي بيختار التاسكات كل يوم، لكن في الحقيقة مابيخرجش برة الإطار الأسبوعي.

اللي نفع معايا إنك تكون عشوائي شوية بس بحدود، يعني تكون عارف عايز تخلص إيه وتضيفه عندك في ليستة، وطول ما وقتك يسمح شد من الليستة دي. مش لازم كل حاجة تبقى perfect.

وبالمناسبة، عقلية All or nothing دي ضيعت مني كتير برضه. فتقبل إن فيه حاجات ممكن ماتخلصش عادي، بس المهم إنك تسجل الأفكار الجديدة اللي بتجيلك وتضيفها عندك، وكل ما يكون عندك وقت جرب حاجة جديدة.

أحياناً كنت بعمل خطط وبضيع فرص كتير لمجرد إني عايز أمشي على الخطة اللي أنا عاملها وخلاص، حتى لو الحاجة الجديدة أحسن من اللي موجود عندي في الخطة.

1. كنت بنزل في سعر الخدمات اللي بقدمها، لدرجة إني أحياناً كنت بظلم نفسي وبشتغل مدة أطول، وبلاقي النتيجة مش مرضية.
2. كنت مقرر إني هكمل كـ Freelancer، وجه عليا وقت كنت محبط فيه واشتغلت في كام شركة، وده ضيع عليا فرص وعملاء كتير.
3. أوقات كتير مكنتش حاطط هدف لليوم، ولا عارف المفروض أخلص إيه، والنتيجة إن معظم اليوم بيضيع.
4. كنت بصحى وقت ما أنا عايز.
5. كنت بستخسر أحياناً أشتري كورسات.
6. اشتغلت في مشاريع لمجرد إني مكنتش عارف أقول "لا".
7. جربت applications كتير علشان أنظم التاسكات اللي عليا، وده ضيع وقت كبير مني.
8. لما كنت ببقى مضغوط في الشغل، كنت بوقف البوستات والشرح، مع إن الموضوع ده ممتع جداً بالنسبالي.
9. مكنتش بحط حدود ولا أوقات للتواصل بيني وبين العملاء، وده في فترة من الفترات كان بيضغط عليا نفسياً جداً.
10. كنت بفكر دايماً إن أي حاجة لازم أتعلمها تكون علشان هستخدمها بكرة، مع إن الحقيقة إن فيه حاجات بتتعلمها وممكن تفيدك بعد سنين، مش لازم في وقتها.
11. وأكبر غلطة بالنسبالي: ساعات كنت ببدأ شغل من غير مقدم، وفعلاً دي من أكتر الغلطات اللي أتمنى محدش يقع فيها.

مافيش حاجة اسمها هتعلم Laravel على طول، من قبل ما أعرف يعني إيه PHP وأفهم أساسياتها، وأفهم يعني إيه OOP على الأقل، وغيرهم من المواضيع الأساسية لأي حد.

بعد كده لازم تعمل مشروع بإيدك بـ PHP بس، من غير أي فريم ورك، علشان تفهم الأساسيات دي صح. والمشروع يكون بسيط، علشان بس توظف الأساسيات اللي إنت ذاكرتها وتفهم فايدتها إيه.

ده لازم تعمله قبل ما تدخل على Laravel مباشرة، لإن وظيفة الفريم ورك هي التسهيل وتوفير الوقت لما تكون شغال مع عميل أو في شركة. لكن حالياً، إنت مش عايز توفر وقت قد ما لازم تتعلم.

حبيت بس أنبه على الموضوع ده، لإني بشوف كتير بيتعلموا Laravel من قبل ما يعرفوا يعني إيه PHP.

1. جهّز كويس جداً الطريقة اللي هتتكلم بيها عن نفسك. للأسف من كتر ما الموضوع ده بديهي بقينا بنهمل فيه، لكنه مهم جداً.
2. إنك تستخدم الكاميرا دي بتفرق فوق ما تتصوّر، وبتدي انطباع كويس عنك.
3. لازم تكون مظبط المايك والإضاءة على قد ما تقدر قبل ما تدخل الميتنج.
4. اعمل سيرش عن العميل أو الشركة بتاعته، وافهم البيزنس كويس، وشوف إنت اشتغلت في إيه زيه قبل كده، وحاول تتكلم عنه أكتر في الميتنج.
5. في حاجة ممكن الناس تستغربها شوية، بس لو اتسألت في حاجة إنت ماتعرفهاش، قول معرفش عادي جداً.
6. لو قالك ميعاد معين واتأخر عنه مدة من غير ما يقولك أسباب، فكك منه وماتكملش معاه.
7. لو فاتح الكاميرا، ماتخليش الموبايل جنبك، علشان ممكن بطريقة لا إرادية تبص فيه كل شوية وإنت مش واخد بالك.
8. بلاش تعمل الميتنج ده في كافيه علشان الدوشة، خليه في البيت أو أي مكان هادي لو تقدر.
9. ودي أهم نصيحة: لو بتاع زيت السمك ماجاش في الوقت ده، روح اطمن عليه، لأن أكيد فيه حاجة كبيرة منعته إنه يستغل الفرصة دي!

اللي عملته بالظبط

جهزت الباك إند كله، وكتبت كل متطلباتي "بالتفاصيل"، واديتها لـ Lovable علشان يعمل كل الـ UI (أحسن tool شوفتها للفرونت إند لحد دلوقتي).

وفي الآخر خدت الكود اللي هو عمله، وضفت بس الـ postman_collection.js في المشروع، وكتبتله الـ endpoint المقترحة لكل صفحة. وحرفياً في خلال نص ساعة أو أقل كان عامل integration كامل للـ API بتاعتي مع الفرونت.

مشاكله بالنسبالي

إنه لو فيه مشكلة في الـ API مش بيقول بشكل مباشر. وهنا أدركت قد إيه إحنا كنا في نعمة لما صحابنا الفرونت إند يقولولنا إن الـ API بترجع 500.

المهم بتاخد وقت شوية على ما تفهم المشكلة وتحلها في الباك، وبعد كده بترجعله وهو بيكمل. ملخص التجربة إنه تقريباً خلص 90% من اللي أنا كنت عايزه.

لكن لو حد سألني: هل هتقدر تعتمد عليه بالكامل لما المشروع والبيزنس يكبروا ويبقوا معقدين؟ ببساطة هقولك لأ، بس الله أعلم إيه اللي هيحصل بكرة.

امبارح تقريباً، بحسبة بسيطة كده، أقدر أقول خلصت شغل 5 أيام في يوم واحد، وبالـ API Documentation وبالـ Testing كمان.

الفكرة إني جبت مشروع كان موجود بالفعل، وطلبت من Codex كام حاجة مش سهلين أوي ولا في غاية الصعوبة، بس برده محتاجين شغل وتركيز، لإن فيهم حسابات ومطلوب نستخدم Third-Party Services، لكنه عملهم بنسبة خطأ بسيطة.

طب هل أي حد ينفع يستخدمه ويطلع بيه شغل؟

هنا الناس اختلفت بقى. في المجمل الأدوات متوفرة لأي حد، وممكن يطلع بيها شغل. الفرق هو إن النتيجة مش مجرد كود شغال وخلاص، إنما كود له معالم وسهل التعديل عليه بعد كده.

على سبيل المثال، أنا كنت بقوله يستخدم Design Patterns معينة علشان الكود في الآخر يطلع كويس وله ملامح. لإن لو سيبته بمزاجه، الكود مش هيكون له أي معالم، وهيبقى حتى صعب حد يكمل عليه.

طيب إنت يا باك إند يا غلبان، مطلوب منك إيه دلوقتي؟

خصوصاً اللي لسه بيبدأ: إنك تذاكر الأساسيات كويس جداً (فاكرني هقولك سيبك منها؟ تبقى غلطان).

لكن معاها لازم تفهم وتقرأ عن الـ Software Architecture، وحاجات High Level زي الـ Security والـ Performance، وحاجات من النوعية دي، ممكن تبحث عنها علشان تفهمها أكتر. معلش الموضوع بقى صعب، أنا عارف، بس هي دي الدنيا، هنعمل إيه؟

المهم ما تحاولش تحصر نفسك في جزء الـ Syntax وفي دور اللي بينفذ بس، لإن فيه دلوقتي حاجات بتعمل ده مكانك، والمطلوب حد يوجهها كويس.

وبالنسبة للتجربة

كانت كويسة ومنجزة جداً، لكن مكانتش "المبهرة" بالنسبالي قد ما كان مبهر شغل الـ Frontend، وده اللي بجربه حالياً وهتكلم عنه في مقال تاني مفصل.

يعني مثلاً، حد بيحب مجال الـ eLearning والـ LMS، لما ييجي يشتغل فيه، هو كده مبقاش مجرد ديفلوبر شغال مع العميل. هو بقى كأنه شريك فاهم البيزنس، وهيقدر يساعد العميل نفسه.

ده لإنه عمل ميكس ما بين حاجتين مهمين: فهم البيزنس والـ technical skills. ودي من أهم الحاجات اللي هتساعدك تنافس بقوة في السوق.

طبعاً العميل كلمني مضايق، واكتشفنا بعدها إن فعلاً الـ API واقعة بسبب إن الميل سيرفس كانت انتهت ولازم تتجدد، ولما جددناها كل حاجة اشتغلت زي الفل.

الدروس المستفادة

1. خد بالك إنك لو معتمد على سيرفس خارجية وحصل فيها مشكلة، الـ endpoint ماتقعش والدنيا تعطل بسببها.
2. اعمل صفحة أو command أو أياً كان، يعمل check على أي سيرفس خارجية إنت بتستخدمها، ويا ريت يكون العميل له أكسس عليها، علشان لو فيه حاجة هو يقدر يعملها من نفسه.
3. ودي الأهم بالنسبالي: ماتشتغلش مع فرونت إند عصفورة.

فقرر ياخد ساعة أو اتنين من وقته يشتغل على مشروع جانبي بشكل عشوائي، بس لمجرد إنه يجرب حاجات جديدة بيسمع عنها، ومفيش فرصة يجربها في شركته الحالية.

بعد شهر تقريباً من التزامه بالساعتين دول يومياً:

• لقى نفسه قرأ مقالات كتير علشان ينفذ المشروع ويتعلم أكتر.
• بعد ما نشر المشروع وجمع الآراء المفيدة بالنسباله، بدأ ينفذها لحد ما المشروع بقى له ملامح ومنظم أكتر.
• عمل شبكة علاقات كويسة مع ناس مهتمة باللي هو بيعمله.

لحد ما في مرة حد من شركة كبيرة شاف المشروع بالصدفة واتواصل معاه، وبعدها قدموله عرض أفضل بكتير من الحالي، لأن المشروع كان مشابه لحاجة شغالين عليها في الشركة.

اللي حابب أوصله إن فعلاً المشاريع الجانبية ليها مفعول سحري على المدى البعيد، حتى لو بدأت بعشوائية ومن غير تخطيط.

• أول واحد، وده السينيور اللي عندي: Claude، خصوصاً نسخة الـ Opus. وفعلاً عنده قدرة رهيبة إنه يخلص موديول كامل في وقت قياسي، بس بشرط تكون مديه وصف واضح وكاتب prompt محترم علشان يعملك اللي إنت عايزه.
• وطبعاً ChatGPT، وده الديفلوبر اللي مطلع عيني واللي دايماً بنتخانق، لكن شاطر جداً في الـ documentation وتنظيم الأفكار، وبيساعدني أنظم التاسكات والشغل اليومي. وبرة الشغل إحنا صحاب، بنتناقش في أي حاجة تانية.
• وأخيراً الموظف الرايق Lovable.dev، اللي بستعين بيه في التصميم والـ frontend، وبيطلع شغل حلو جداً، ويقدر يصمملك Landing Page كاملة، بس برضه تكون محدد متطلباتك بالظبط.

التلات أدوات دي ساعدوني فعلاً إني أركز أكتر على الـ architecture والتاسكات الـ high level، زي تصميم الداتا بيز مثلاً، وشالوا من عليا عبء التاسكات الروتينية المملة.

1. في المقابلات اسمع أكتر ما تتكلم (ودي نصيحة عموماً حتى برة الشغل).
2. ماتاخدش قرارات ولا تبعت إيميلات تماماً وإنت منفعل أو وإنت مبسوط.
3. ماتبدأش شغل غير لما تكون كل حاجة واضحة. على الرغم من إن ده يبان بديهي، لكن ناس كتير بيكونوا متحمسين يقفلوا الـ deal بسرعة حتى من غير ما يفهموا كل المطلوب.
4. خد وقتك جداً في العرض اللي بتقدمه، سواء كان timeframe أو pricing.
5. كل حاجة تبقى مكتوبة وموثقة بين كل الأطراف.
6. لما ترفض عرض أو ماتتفقوش، ماتقفلش الباب مع العميل وخلي فيه علاقة كويسة بينكم.
7. دايماً حاول تشتغل على تسويق نفسك وشغلك، حتى لو مضغوط وعندك كم كفاية من المشاريع.

1. الـ lexing: يراجع الورق كلمة كلمة، بحيث لو فيه أخطاء إملائية في الكلمات يرجعها علشان تتعدل.
2. الـ parsing: بعد ما يتأكد إن كل الكلمات مظبوطة، يبدأ يقرأ الجمل وينسقها مع بعض، ويشوف إذا كانت مفهومة ولا لأ.
3. الـ semantic analysis: بعد ما خلاص اتأكد إن كل حاجة تمام، يبدأ يقسم الشخصيات والأدوار ويربطهم ببعض.
4. الـ optimization: في الآخر يبدأ يبص للحوار كله من برة، ويشوف إذا كان فيه جمل متكررة أو ملهاش لازمة (dead code elimination) ممكن تتحذف من الورق.

في النهاية، كل المراحل والخطوات دي خدت وقت طويل في البداية، ووارد إن الأخطاء تعطل العملية أكتر، لكن في الآخر وقت عرض المسرحية (تنفيذ الكود) بتكون كل حاجة جاهزة ومظبوطة.

تخيل إنك معاك قطعة مانجا سليمة، وجيت ضربتها في الخلاط علشان تعمل عصير. فطبعاً في الحالة دي استحالة ترجع سليمة تاني، وهو ده الـ one way.

الـ Encryption

زي ما تكون قاعد مع واحد صاحبك، وفيه واحد غريب معاكم ومش عايزين تعرفوه اللي بيدور بينكم، فتتكلموا مع بعض بالسيم (encryption key). إنتوا فاهمين بعض كويس، لكن هو مش فاهم حاجة.

تخيل كده إنك (client) عايز تنزل تشتري حاجة من السوبر ماركت (server)، بس مش عايز حد يعرفك في الشارع لسبب ما. فتروح تقول لأخوك (proxy) ينزل بدالك، وهو اللي يشتري من السوبر ماركت (server).

فهنا الـ proxy هو اللي بيقوم بدورك كـ client وبيتواصل مع الـ server بدالك.

الـ Reverse Proxy

لما موظف استقبال شركة (reverse proxy) يستلم الطلبات من العملاء (client)، وهو اللي يوزعها على المكان المناسب بمعرفته جوه الشركة دي (server).

هنا بقى الـ reverse proxy هو الوكيل عن السيرفرات، وهو اللي بيوزع عليهم الطلب. وبالمناسبة، هي دي فكرة الـ load balancers.

• دايماً ابعت الـ update بتاع شغلك قبل ما تبدأ اليوم، ماتستناش حد يسألك عليه.
• أي حد يطلب منك ميتنج، اسأله الأول الميتنج بخصوص إيه، لأن ممكن الموضوع يخلص من غير ميتنج.
• لو شايف إنك هتتأخر في تسليم الشغل اللي معاك، بلغ قبلها بدري وحاول تحط خطة بديلة أو ميعاد تاني.
• لما حد يسألك عن الـ estimation، أنا عارف إننا بنكون مش محددين ده هيخلص إمتى، لكن على الأقل قول ميعاد تقريبي وعرفهم إن ده ممكن يتغير.
• لما تعمل PR لازم تكتب description واضح وتكون مختصرة، علشان اللي هيراجعها مايتوهش.
• افهم Git كويس جداً.
• حاول تلغي الـ notifications اللي تلهيك عن الشغل.
• إنت والـ testers مش أعداء.
• مش أي رسالة تجيلك على Slack تروح تشوفها في وقتها. خلي في وقت معين للرد على الرسايل دي علشان تعرف تركز.
• ماتبدأش في أي task غير لما يكون ليها وصف مفصل وواضح.
• لما ترفع شغلك على staging أو production اعمل تست كويس جداً عليهم، وماتعتمدش على "إنها شغالة عندك لوكال".
• اكتب examples واضحة للـ APIs بتاعتك على Postman.
• لو هتمشي من المكان أو هتسيب المشروع، اعمل handoff كويس.

بس هل ده معناه إنه ملهوش تأثير؟ لأ، هيكون له تأثير كبير كمان، لكن علشان يزود قيمتك ومعرفتك. يعني حالياً بقى أي حد يعرف يطلع كود، لكن تعالى نتكلم وقتها على الـ security، performance، scalability وحاجات كتير.

يعني نقدر نقول الـ AI ممكن يخلي أي حد coder، لكن مش هيخليه developer، لأن مهما كان تطور الـ AI فهو محتاج guides يمشي عليها.

إزاي بيعلي قيمتك كـ developer

• بيخليك تكتب كود أحسن، سواء من ناحية الـ best practices أو الـ architecture.
• بيساعدك في الـ testing (الحاجة اللي مكنتش واخدة حقها قبل كده للأسف)، لكن دلوقتي بقت إجباري.
• بيكتبلك docs منظمة وواضحة.
• هيساعدك إنك تكتب description واضح للـ PRs بتاعتك.
• هيساعدك برضه إنك تكتب proposals محترمة وواضحة.

وغير الحاجات دي كتير جداً، المهم إنك تعرف إزاي تستخدم الأدوات دي لصالحك.

• فكك من جو المقارنات وإن الناس سابقاك، ومن الحاجات اللي ممكن تزود الإحساس ده عندك، سواء من بوستات LinkedIn أو Instagram.
• خليك مدرك إننا هنموت ولسه فيه tools ماجربناهاش، ولا حتى يمكن هنسمع عنها.
• آخر كل يوم شوف: هل عملت اللي عليك ولا لأ؟ لو آه، اعرف إن ربنا هيكرمك على قد سعيك، ومش لازم يكرمك بالطريقة اللي إنت عايزها على فكرة.
• واظب على الصلوات والأذكار، فعلاً هيفرق جداً.
• اتكلم مع دكتور نفسي، عادي جداً مش عيب، وفيه مواقع أونلاين كتير كويسة.
• لازم يبقى ليك وقت لنفسك تعمل فيه اللي بتحبه أو تتمشى. التمشية بتفرق كتير جداً، وبالمناسبة هتلاقي أحسن أفكار جتلك وإنت بتتمشى.
• حاول تشتغل على مشروع جانبي حتى لو بسيط جداً، لكن هيفرق معاك كتير وهيحسسك بالإنجاز.
• وأخيراً الرد البديهي: لازم تتحرك وتلعب رياضة، خصوصاً لو شغلك من البيت.

أنا كتبت النقط اللي جت في دماغي بعشوائية كده ومن غير ترتيب.

فحبيت أعمل باكدج تكون مسؤولة عن الـ generation بتاع الـ dummy data بشكل متقدم شوية.

بتعمل scan للـ model بكل الـ fillable attributes بتاعته والـ data types، وفي الآخر تعمل الـ dummy data بأي عدد إنت عايزه. فأعتقد ممكن برضه تبقى مفيدة لإخواتنا الـ testers.

الـ integration مع OpenAI

النسخة اللي شغال عليها دلوقتي هي integration مع OpenAI، بحيث إنك تكتب سيناريو معين، زي مثلاً: عايز عدد X من الطلبات مربوط بمستخدمين من دولة معينة، وسنهم يكون أكبر من 30 سنة، وكل طلب يكون فيه منتجات مختلفة.

فبتعمل generation لشوية منتجات ومستخدمين ودول في نفس الوقت، بناءً على الـ prompt اللي إنت كاتبه.

حالياً هي بتدعم Filament بس، لكن هيكون فيه زيها لـ Nova و Laravel بشكل عام عن طريق الـ CLI.

في النهاية الهدف منها هو توفير شوية وقت ومجهود. أتمنى تكون مفيدة، ولو فيه أي اقتراحات أو إضافات أشوفكم على الـ GitHub.

1. مش لازم تقول رأيك في كل حاجة حواليك.
2. اقطع الزيوت النباتية وقلل الملح.
3. امنع التليفزيون خالص، حفاظاً على قواك العقلية.
4. استخدم الـ focus mode على الموبايل، ماتخليش كل الـ notifications متاحة طول الوقت.
5. فكرة إنك تتمرن على الأقل نص ساعة في اليوم دي مبقتش رفاهية.
6. حاول تبدأ يومك بدري على قد ما تقدر.
7. ماتدخلش نقاشات على الفيسبوك.
8. الروتين مش وحش، بالعكس، لازم يبقى فيه روتين في يومك مريح ليك وعملي.
9. لازم يبقى فيه وقت كل يوم تقضيه مع نفسك.
10. المشاوير اللي فيها تضييع وقت، زي المشاوير الحكومية، خلي حد يقوم بيها مكانك (لو ينفع).
11. زكاة العلم نشره، حاول تعلّم غيرك (بس تكون متأكد من اللي بتقوله، الله يخليك).
12. حافظ على الأذكار دايماً وعلى صلاة الضحى.
13. طلّع مبلغ أول كل شهر، ولو مبلغ بسيط جداً، لكن داوم عليه.
14. استخدم الورقة والقلم في ترتيب أفكارك.
15. قلل سقف طموحك في كل حاجة، هتتبسط دايماً بالنتايج.
16. لو عايز تعمل أي حاجة (لغة جديدة، مهارة، ...) ابدأ على طول، ماتفكرش كتير.
17. الشغل 18 ساعة في اليوم مش شطارة خالص، بالعكس، معناها إنك مش عارف تظبط يومك.
18. اتعامل مع LinkedIn بحذر.
19. لو حاجة هتاخد منك 5 دقايق اعملها حالاً، ماتأجلهاش.
20. حاول ماتمسكش موبايلك أول ساعتين في اليوم.