إزاي تبني Personal Brand كمبرمج حتى لو لسه مبتدئ؟

لو عايز تبني Personal Brand قوي، ماينفعش يكون كل اعتمادك على إنك تجيب معلومات وتنشرها. دلوقتي أسهل حاجة تجيبها هي المعلومة، لكن محتاج تبني براند قايم على التجارب والخبرات اللي إنت مريت بيها، حتى لو إنت لسه مبتدئ.

الناس هتحب جداً تسمع القصص والتجارب بتاعتك، غير إن ده مع الوقت بيخلي شريحة من الناس تثق فيك.

طب أنا مبتدئ ومعنديش خبرات، أعمل إيه؟

شاركنا الرحلة بتاعتك، وقولنا بتعمل إيه علشان تتعلم أو تطور نفسك.

من نوعية المحتوى اللي بحبها جداً، لما حد يكتب إنه هيعمل تحدي 100 يوم علشان يتعلم حاجة معينة، زي الباك إند مثلاً، ويفضل ينزل بوست أو فيديو عن اللي اتعلمه النهارده. البوستات دي بتشجعني أنا شخصياً، وبيكون عندي فضول أعرف هو وصل لإيه.

الـ handover جزء من البراند بتاعك

دلوقتي كله بيتكلم عن الـ personal branding، ورغم إنه موضوع مهم حتى لو الناس بقت بتسف عليه كتير، لكن واحدة من أهم الحاجات فيه، واللي محدش بيتكلم عنها، هي الـ handover.

لما تمشي من شركة أو مشروع، لازم تسلمه وتمشي بشكل يليق بيك، لأن السيرة دي هي اللي بتفضل. كمان لو فيه أي مشاكل متوقعة في الكود ومالحقتش تحلها، اقعد مع الشخص اللي بيستلم وفهّمه كل حاجة وإزاي يحلها.

التفاصيل الصغيرة دي هي اللي بتبني البراند بتاعك، مش شرط البراند يكون لوجو وبوستات وفيديوهات.