تجربتي مع Codex بعد Claude Code، وده معناه إيه للـ Backend؟

عايز أحكي تجربتي مع Codex بعد ما كنت شغال بـ Claude Code بقالي فترة.

امبارح تقريباً، بحسبة بسيطة كده، أقدر أقول خلصت شغل 5 أيام في يوم واحد، وبالـ API Documentation وبالـ Testing كمان.

الفكرة إني جبت مشروع كان موجود بالفعل، وطلبت من Codex كام حاجة مش سهلين أوي ولا في غاية الصعوبة، بس برده محتاجين شغل وتركيز، لإن فيهم حسابات ومطلوب نستخدم Third-Party Services، لكنه عملهم بنسبة خطأ بسيطة.

طب هل أي حد ينفع يستخدمه ويطلع بيه شغل؟

هنا الناس اختلفت بقى. في المجمل الأدوات متوفرة لأي حد، وممكن يطلع بيها شغل. الفرق هو إن النتيجة مش مجرد كود شغال وخلاص، إنما كود له معالم وسهل التعديل عليه بعد كده.

على سبيل المثال، أنا كنت بقوله يستخدم Design Patterns معينة علشان الكود في الآخر يطلع كويس وله ملامح. لإن لو سيبته بمزاجه، الكود مش هيكون له أي معالم، وهيبقى حتى صعب حد يكمل عليه.

طيب إنت يا باك إند يا غلبان، مطلوب منك إيه دلوقتي؟

خصوصاً اللي لسه بيبدأ: إنك تذاكر الأساسيات كويس جداً (فاكرني هقولك سيبك منها؟ تبقى غلطان).

لكن معاها لازم تفهم وتقرأ عن الـ Software Architecture، وحاجات High Level زي الـ Security والـ Performance، وحاجات من النوعية دي، ممكن تبحث عنها علشان تفهمها أكتر. معلش الموضوع بقى صعب، أنا عارف، بس هي دي الدنيا، هنعمل إيه؟

المهم ما تحاولش تحصر نفسك في جزء الـ Syntax وفي دور اللي بينفذ بس، لإن فيه دلوقتي حاجات بتعمل ده مكانك، والمطلوب حد يوجهها كويس.

وبالنسبة للتجربة

كانت كويسة ومنجزة جداً، لكن مكانتش "المبهرة" بالنسبالي قد ما كان مبهر شغل الـ Frontend، وده اللي بجربه حالياً وهتكلم عنه في مقال تاني مفصل.